Ֆիլիպինների ափերի մոտ տեղի է ունեցել
7.4 մագնիտուդ ուժգնությամբ երկրաշարժ, հայտարարվել է ցունամիի սպառնալիք: Այս մասին
հայտնել է ԱՄՆ Սեյսմոլոգիական և օդերևութաբանական կենտրոնը։
ԱՄՆ երկրաբանական ծառայության տվյալներով՝
ստորերկրյա ցնցումների էպիկենտրոնը գտնվել է Դավաո նավահանգստային քաղաքից 144 կիլոմետր
հեռավորության վրա, օջախը՝ 58 կիլոմետր խորության վրա։
Ֆիլիպինների հրաբխագիտության և սեյսմոլոգիայի
ինստիտուտի տվյալներով՝ երկրաշարժի ուժգնությունը կազմել է 7.6 մագնիտուդ։
Ցունամիի սպառնալիքի մասին հայտարարել է ԱՄՆ
օվկիանոսային և մթնոլորտային հետազոտությունների ազգային վարչությունը (NOAA)։
«Հնարավոր են ցունամիի վտանգավոր ալիքներ երկրաշարժի
էպիկենտրոնից 300 կիլոմետրի սահմաններում տեղակայված ափերում»,- ասվում է վարչության
հայտարարության մեջ։
Երկրաշարժից հետո տարածաշրջանի մի քանի
քաղաքների դպրոցներում չեղարկվել են պարապմունքները։ Հաղորդումներ են ստացվել շենքերի
վնասման մասին։ Ցունամիի սպառնալիքի պատճառով հայտարարվել է տարհանում։ Նախնական
տեղեկություններով՝ մեկ մարդ մահացել է։
