ԿԲ–ն պարզել է, որ «bank24.am» անվանումով ներկայացող ընկերությունն իր կողմից բացված կայքէջերի և տարբեր սոցիալական ցանցերում (Tiktok, Facebook, Instagram) հրապարակված գովազդների միջոցով հանդես է գալիս վարկեր տրամադրելու հրապարակային առաջարկությամբ:

«Տեղեկացնում ենք, որ նշված ընկերությանը ՀՀ կենտրոնական բանկի կողմից չի տրամադրվել որևէ տեսակի գործունեություն իրականացնելու լիցենզիա, հետևաբար վերջինս գործում է ՀՀ կենտրոնական բանկի վերահսկողության շրջանակից դուրս»,– ասված է հաղորդագրությունում:

ԿԲ–ն քաղաքացիներին հորդորում է լինել զգոն և օգտվել բացառապես ՀՀ կենտրոնական բանկի կողմից լիցենզավորված ֆինանսական ծառայություններ մատուցող կազմակերպություններից, որպեսզի խուսափեն զեղծարարություններից և ֆինանսական կորուստներից։

ՀՀ կենտրոնական բանկը հրապարակել է իր կողմից լիցենզավորված բանկերի և վարկային կազմակերպությունների ցանկը, որում ներառված են 17 բանկեր և 43 վարկային կազմակերպություններ։