Վրաստանը հրաժարվել է մասնակցել «Եվրանեսթ» Խորհրդարանական վեհաժողովի 12-րդ լիագումար նիստին, որը տեղի կունենա հոկտեմբերի 28-30-ը Երևանում:

Եվրաինտեգրման հարցերով խորհրդարանական կոմիտեի նախագահ Լևան Մախաշվիլին սոցցանցերում նամակ է հրապարակել՝ ուղղված «Եվրանեսթ»-ի ղեկավարությանը: Դրանում որոշումը բացատրվել է նրանով, որ ««Եվրանեսթ» Խորհրդարանական վեհաժողովի վերջին գործողությունները լուրջ անհանգստություն են հարուցում Ասամբլեայի հիմնադիր ակտի հիմնարար սկզբունքների ու նպատակների և Պրահայի «Արևելյան գործընկերության» գագաթնաժողովի համատեղ հռչակագրի հետ անհամապատասխանության պատճառով»։

Վրացական կողմը դատապարտել է որոշ եվրախորհրդարանականների մասնակցությունը «բողոքի ակցիաներին Վրաստանի խորհրդարանի շենքի մոտ», ինչը, նրանց կարծիքով, «դուրս է գալիս խորհրդարանական դիվանագիտության սահմաններից»։ Փաստաթղթում պնդվում է, որ նրանց հայտարարությունները «խրախուսել են հասարակական անկարգությունները, արմատականացումը և բռնությունը» երկրում։