Բելառուսի նախագահ Ալեքսանդր Լուկաշենկոն Բերեզինայի կենսոլորտային արգելոց այցելության ժամանակ հայտարարել է, որ Եվրոպան շուտով կվճարի երկրին մաքուր օդի համար, որ ձևավորվել է պահպանված բելառուսական անտառների և ճահճուտների հաշվին։ Այս մասին հայտնում է ԲԵԼՏԱ-ն:

«Սա ապագան է, և մենք պետք է պահպանենք այն։ Եվ կգա ժամանակը, երբ այդ գարշահոտ Եվրոպան կվճարի մեզ այն բանի համար, որ մենք պահպանել ենք Աստծու կողմից տրվածը»,- ասել է Բելառուսի նախագահը։

Լուկաշենկոն ընդգծել է, որ «ԵՄ երկրները գրեթե չունեն նման բնական պաշարներ, իսկ քամին մաքուր օդը Բելառուսից տանում է եվրոպական տարածք»։

«Փոխանակ դրա համար վճարելու, նրանք փորձում են մեզ խեղդել պատժամիջոցներով։ Դա կանցնի, արդեն անցնում է։ Կարծում եմ՝ հեռու չէ այն ժամանակը, երբ նրանք մեզ կվճարեն դրա համար»,- հայտարարել է Լուկաշենկոն։