Ղազախական ցորենից բացի երկաթուղով Ադրբեջանի տարածքով դեպի Հայաստան հիմա էլ ճանապարհ է ընկել ռուսական ծագման ցորենը: Այս մասին հայտնում է ԱԺ փոխնախագահ Ռուբեն Ռուբինյանը։
«Այսինքն ոչ միայն Ղազախստանից, այլ նաև ՌԴ-ից է 90-ականների սկզբից ի վեր առաջին անգամ երկաթուղով Հայաստան որևէ բան ներմուծվում Ադրբեջանի տարածքով:
Խաղաղությունը սա է: Առաջ գնալը սա է»,-նշել է նա:
Հիշեցնենք՝ Ադրբեջանի նախագահ Իլհամ Ալիևը 2025 թվականի հոկտեմբերի 21-ին Ղազախստան կատարած պետական այցի ժամանակ հայտարարել էր, որ Ադրբեջանը վերացրել է Հայաստան բեռների տարանցման բոլոր սահմանափակումները: Համաձայն այդ հայտարարության՝ հացահատիկով բեռնված գնացքն Ադրբեջանի տարածքով շարժվել է դեպի Հայաստան։
Ռուսաստանի Դաշնությունից Ադրբեջանի և Վրաստանի տարածքով տարանցմամբ ձևակերպվել և Հայաստանի Դալարիկ կայարան է ուղարկվել 15 վագոն՝ 1048 տոննա 800 կգ ընդհանուր քաշով հացահատիկով:
