Կենտրոնական ընտրական հանձնաժողովի կայքում, ըստ կարգի, հրապարակվել է նոյեմբերի 16-ին Վաղարշապատում կայանալիք  ՏԻՄ ընտրություններին մասնակցող քաղաքական ուժերի  նախընտրական հիմնադրամների ֆինանսական մուտքերի և ելքերի վերաբերյալ տեղեկանք՝ ըստ բանկերի կողմից տրամադրված տվյալների (2025թ. հոկտեմբերի 30-ի դրությամբ)։  ԿԸՀ-ի տեղեկանքի համաձայն՝  «Քաղաքացիական պայմանագիր» կուսակցության նախընտրական հիմնադրամին կատարվել է 40 մլն դրամ մուտք, ելք՝ 34 մլն 912 հազար 891 դրամ։ Ռոբերտ Քոչարյանի աջակիցների կողմից ստեղծված կուսակցության՝ «Առաջ» աջակենտրոն և ՀՅԴ կուսակցությունների ձևավորած «Հաղթանակ» դաշինքի հիմնադրամի մուտքը կազմել է 16 մլն 810  հազար դրամ, ելքը՝ 13 մլն 609 հազար 280 դրամ։ Այս դաշինքի ցուցակը, հիշեցնենք, գլխավորում է «Սաքուլիկ» մականունով հայտնի նախկին ՀՀԿ-ական Սևակ Խաչատրյանը։   

Քոչարյանի փաստացի ղեկավարմամբ գործող ԱԺ «Հայաստան» խմբակցության նախկին պատգամավոր Անդրանիկ Թևանյանի ղեկավարած «Մայր Հայաստան»-ի ելքն ու մուտքն էլ կազմել են համապատասխանաբար 7 մլն 500 հազար դրամ և 5 մլն 124 հազար դրամ։

Արամ Զավենի Սարգսյանի ղեկավարած «Հանրապետություն» կուսակցության  հիմնադրամին հաշվետու ժամանակաշրջանում տեղի է ունեցել 2 մլն դրամ մուտք, որից 932 հազարը ելք է արվել, քաղաքական վերլուծաբան Սուրեն Սուրենյանցի «Ազատ դեմոկրատներ»-ի ելքն ու մուտքը կազմել են 1 մլն դրամ և  883 հազար դրամ։ 1 մլն դրամ մուտք ու նույնքան էլ ելք է կատարվել ԱԱԾ նախկին տնօրեն Արթուր Վանեցյանի գլխավորած «Հայրենիք» կուսակցության նախընտրական հիմնադրամին, իսկ Րաֆֆի Հովհաննիսյանի «Ժառանգություն» կուսակցության հիմնադրամին կատարված  ելքն ու մուտքը կազմել են համապատասխանաբար  500 հազար դրամ և 487 հազար դրամ։ Միակ քաղաքական ուժը, որի հիմնադրամին և ոչ մի լումա մուտք ու ելք չի եղել՝ պաշտպանության նախկին նախարար, ՌԴ-ում ծվարած, ՀՀ-ում իշխանափոխություն անելու բոցաշունչ հրովարտակներով հանդես եկող Արշակ Կարապետյանի «Համահայկական ճակատ» կուսակցությունն է։ Սա այն դեպքն է, երբ պետք է ասել՝ «էս հալո՞վ են» հավակնում իշխանության։  

Հիշյալ 8 քաղաքական ուժերի հիմնադրամների ելքերն ու մուտքերը, նշենք,  ընդհանուր առմամբ կազմել են 68 մլն 810 հազար դրամ և 57 մլն 948 հազար 921 դրամ։

Հ.Գ. Ուսումնասիրելով մասնավորապես «Հաղթանակ»-ի հիմնադրամի ելումուտի տվյալները՝ նկատեցինք, որ բոլոր մուտքերը կատարվել են «Առաջ»-ի կողմից, ՀՅԴ-ի կողմից  կատարվել է միայն 5 մլն դրամի մուտք։ Մեկ այլ ուշագրավ հանգամանք էլ՝ «Հաղթանակ»-ի 99-հոգանոց ընտրական ցուցակի առաջին համարը  «Առաջ»-ի անդամ է, երկրորդը՝ անկուսակցական, երրորդ և չորրորդ համարները նույնպես «Առաջ»-ականներ  են, և միայն 5-րդ համարը ՀՅԴ-ից է։  ՀՅԴ-ականները, նկատենք, ընտրական ցուցակում սակավաթիվ են,  որոնցից մեկն էլ ինքնաբացարկ է հայտնել։  Այսպիսով  ի դեմս Սևակ Խաչատրյանի՝ վաղարշապատցի ընտրողին է ներկայանում քոչարյանական ուժի քաղաքապետացուն, իսկ ՀՅԴ-ն, դաշնակցելով «Առաջ»-ի հետ, փորձում է սքողել նախկին ՀՀԿ-ական Ս. Խաչատրյանի՝  «Ռոբի թեկնածու» լինելու անպատվությունը։     

Հ. Մ.