Ուկրաինայի նախագահի գրասենյակի ղեկավար Անդրեյ Երմակը
հայտարարել է՝ քանի դեռ Վլադիմիր Զելենսկին նախագահ է, նա չի համաձայնի տարածքներ զիջել
խաղաղության դիմաց։ Երմակն այս հայտարարությունն արել է նոյեմբերի 27-ին The
Atlantic-ի լրագրող Սայմոն Շուստերին տված հարցազրույցում։
«Այսօր ոչ մի խելամիտ մարդ չի ստորագրի փաստաթուղթ
տարածքները զիջելու մասին։ Քանի դեռ Զելենսկին նախագահ է, ոչ ոք չպետք է հույս ունենա,
որ մենք տարածքներ կզիջենք։ Նա չի ստորագրի փաստաթուղթ տարածքներ զիջելու մասին։ Սահմանադրությունն
արգելում է դա։ Ոչ ոք չի կարող դա անել, եթե չի ցանկանում հակասել Ուկրաինայի Սահմանադրությանը
և ուկրաինացի ժողովրդին»,- հայտարարել է Երմակը։
Նրա խոսքով՝ Ուկրաինան պատրաստ է քննարկել միայն
այն, թե որտեղով պետք է անցնի պատերազմող կողմերի կողմից վերահսկվող տարածքները սահմանազատող
գիծը։ «Այն ամենը, ինչը կարող ենք իրատեսորեն քննարկել, միայն շփման գիծը որոշելն է։
Եվ դա այն է, ինչ մենք պետք է անենք»,- ասել է Երմակը։
Սայմոն Շուստերը նշել է, որ Երմակն առաջին անգամ
շարադրել է Ուկրաինայի դիրքորոշումը ռուս-ուկրաինական պատերազմի խաղաղ կարգավորման
շուրջ բանակցությունների հաջորդ փուլում։
