Միացյալ Նահանգները իրավունք չունի խառնվելու ընտրություններին
կամ եվրոպական քաղաքական կուրսին, Politico-ին տված հարցազրույցում հայտարարել է Եվրահանձնաժողովի
նախագահ Ուրսուլա ֆոն դեր Լյայենը։
Նա արձագանքել է ԱՄՆ նոր Ազգային անվտանգության ռազմավարությանը,
որում, ի թիվս այլոց, խոսվում է առաջիկա 20 տարիների ընթացքում Եվրոպայի «քաղաքակրթական
ոչնչացման» սպառնալիքի մասին և քննադատվում ԵՄ քաղաքականությունը ծայրահեղ աջ ուժերի
նկատմամբ։
«Երբ խոսքը գնում է ընտրությունների մասին, մեր գործը
չէ որոշելը, թե ով կլինի երկրի առաջնորդը։ Դա այդ երկրի ժողովրդի գործն է,- նշել է
Եվրահանձնաժողովի նախագահը։- Դա ընտրողների ինքնիշխանությունն է, և այն պետք է պաշտպանվի»։
Ֆոն դեր Լյայենի խոսքով՝ «ոչ ոք չպետք է խառնվի»
ընտրություններին, և «դա նույնիսկ չի քննարկվում»։
Եվրահանձնաժողովի նախագահը ընդգծել է, որ միշտ «շատ
լավ աշխատանքային հարաբերություններ» է ունեցել ԱՄՆ նախագահների հետ, և «այժմ էլ այդպես
է»։ Սակայն նա հավելել է, որ Եվրոպան պետք է կենտրոնանա իր վրա, այլ ոչ թե համեմատի
իրեն ուրիշների հետ։ Ֆոն դեր Լյայենը խոստովանել է, որ ԱՄՆ-ի հետ հարաբերությունները
փոխվել են, քանի որ Եվրամիությունը փոխվում է։
