Մոսկվայում մեքենայի պայթյունի հետևանքով զոհվել
է Ռուսաստանի ԶՈՒ Գլխավոր շտաբի օպերատիվ պատրաստության վարչության պետ,
գեներալ-լեյտենանտ Ֆանիլ Սարվարովը: Այս մասին հայտնում է ՌԴ Քննչական կոմիտեն։
Shot Telegram-ալիքը հայտնել է, որ Յասենևայա փողոցում մեքենայի
պայթյունի պատճառը, նախնական տեղեկություններով, եղել է ինքնաշեն պայթուցիկ սարքը։
Վարկածներից մեկի համաձայն՝ այն պայթել է մի քանի վայրկյան անց այն բանից, երբ Kia
Sorento-ն սկսել է շարժվել: Baza-ի տեղեկություններով՝ մեքենան հասցրել է անցնել մի
քանի մետր։ Բեկորները վնասել են ավտոմեքենայի կողքին եղած առնվազն յոթ մեքենա։
1990-ականներին և 2000-ականների սկզբին 55-ամյա
Սարվարովը մասնակցել է օսեթ-ինգուշական հակամարտությանը և Չեչնիայի պատերազմին,
2015-2016 թվականներին՝ Սիրիայում ռուսական բանակի ռազմական գործողություններին։
Հարուցվել է քրեական գործ սպանության, որը կատարվել է ընդհանուր վտանգավորության
միջոցով, և պայթուցիկ նյութերի անօրինական շրջանառության հոդվածովներով։
«Հետաքննությունը դիտարկում է տարբեր վարկածներ։
Դրանցից մեկը կապված է ուկրաինական հատուկ ծառայությունների կողմից
հանցագործության կազմակերպման հետ»,- ասվում է ՌԴ Քննչական կոմիտեի հայտարարության
մեջ։
Գեներալ Սարվարովի մահվան վերաբերյալ ուկրաինական կողմն առայժմ
մեկնաբանություն չի արել։
