Շրջակա միջավայրի նախարար Համբարձում Մաթևոսյանն այսօր առցանց հանդիպում է ունեցել Բուլղարիայի Հանրապետության Շրջակա միջավայրի և ջրային ռեսուրսների նախարար Մանոլ Գենովի հետ։ Այս մասին տեղեկացնում են ՀՀ շրջակա միջավայրի նախարարությունից:
Հանդիպման ընթացքում քննարկել են շրջակա միջավայրի պահպանության ոլորտում փոխադարձ հետաքրքրություն ներկայացնող մի շարք հարցեր, ինչպես նաև համագործակցության հնարավոր ուղղությունները։
Նախարարը ներկայացրել է ՄԱԿ-ի Կենսաբազմազանության մասին կոնվենցիայի Կողմերի 17-րդ համաժողովի (COP17) կազմակերպչական և օրակարգային առաջնահերթությունները՝ անդրադառնալով առաջիկա միջոցառումների հիմնական շեշտադրումներին ու սպասվող աշխատանքային փուլերին։ Ընդգծել է , որ համաժողովը կարևոր հարթակ է՝ կենսաբազմազանության պահպանության ու կայուն զարգացման նպատակների շուրջ համատեղ քայլերն ու մոտեցումները համադրելու համար։
Առանձնակի ուշադրություն են դարձրել ջրային ռեսուրսների արդյունավետ կառավարման հիմնահարցերին՝ ջրի խնայող և ժամանակակից տեխնոլոգիաների կիրառմանը, ջրային էկոհամակարգերի պահպանությանը, ինչպես նաև ջրային ռիսկերին դիմակայելու և կանխարգելման միջոցառումներին։ Այս համատեքստում կարևորել են փորձի փոխանակումը և համատեղ նախաձեռնությունների խթանումը։
Պայմանավորվել են շարունակել մասնագիտական շփումները և առաջիկայում դիտարկել կոնկրետ համագործակցային հնարավորություններ։
