ԱՄՆ-ի հյուսիս-արևելքում մոլեգնող ձյունամրրիկի հետևանքով ավելի քան 500 հազար տնտեսություն զրկվել է էլեկտրաէներգիայից։ Այս մասին հայտնում է NBC News հեռուստաալիքը։

Յոթ նահանգների իշխանություններ, այդ թվում՝ Նյու Յորքի, Նյու Ջերսիի, Ռոդ Այլենդի և Փենսիլվանիայի, հայտարարել են արտակարգ դրության ռեժիմ։ Նյու Յորք և Բոստոն քաղաքներում սահմանափակվել է ավտոտրանսպորտի տեղաշարժը։ Ազգային օդերևութաբանական ծառայության տվյալներով՝ որոշ բնակավայրերում ձյան շերտի բարձրությունն արդեն անցնում է 90 սմ-ը։

Ձյունամրրիկի պատճառով չեղարկվել են հազարավոր չվերթներ։ Երկրի հյուսիս-արևելքում հասարակական տրանսպորտը չի գործում։ Իշխանություններն արգելել են ուղևորությունները և հորդորել բնակիչներին դուրս չգալ ճանապարհներին։

Նյու Յորքի քաղաքապետ Զոհրան Մամդանին հայտնել է, որ քաղաքում ստեղծված իրավիճակի պատճառով կբացվեն հատուկ ջեռուցման կետեր բնակչության համար։