Աշխատանքի և սոցիալական հարցերի նախարար Արսեն Թորոսյանն այսօր ընդունել է Կարմիր խաչի և Կարմիր մահիկի ընկերությունների միջազգային ֆեդերացիայի գլխավոր քարտուղարի տեղակալ Խավիեր Կաստելանոս Մոսկերային։
ԱՍՀՆ-ից հայտնում են, որ հանդիպման ընթացքում քննարկվել են սոցիալական պաշտպանության ոլորտում համատեղ իրականացվող ծրագրերի ընթացքին, ինչպես նաև համագործակցության զարգացման ուղղություններին առնչվող մի շարք հարցեր։
Նախարար Թորոսյանը բարձր է գնահատել ֆեդերացիայի հետ ունեցած արդյունավետ համագործակցությունը՝ ընդգծելով վերջինիս դերը Ղարաբաղից տեղահանված անձանց սոցիալական աջակցության տրամադրման գործընթացում։ Այս համատեքստում նախարարը մանրամասնել է նաև ոլորտային առաջնահերթությունները և դիտարկել մի շարք ուղղություններով փորձի փոխանակման ու համատեղ նախաձեռնությունների իրականացման հնարավորությունները։
Խավիեր Կաստելանոս Մոսկերան ևս կարևորել է նախարարության հետ համագործակցությունը՝ նշելով, որ ձևավորված կառուցողական երկխոսությունն ու փոխվստահությունը ամուր հիմք են ստեղծում հետագա աշխատանքների համար։
