Հայաստանը մինչև 2026 թվականի դեկտեմբերը պետք է որոշում կայացնի Եվրոպական միությանն անդամակցելու կամ Եվրասիական տնտեսական միությունում (ԵԱՏՄ) անդամակցությունը պահպանելու վերաբերյալ համազգային հանրաքվե անցկացնելու հարցում։ Այս մասին ՏԱՍՍ-ին տված հարցազրույցում հայտարարել է Ռուսաստանի արտաքին գործերի նախարարի տեղակալ Միխայիլ Գալուզինը։
Նրա խոսքով՝ դեկտեմբերին նախատեսված Բարձրագույն եվրասիական տնտեսական խորհրդի նիստում ԵԱՏՄ անդամ պետությունների ղեկավարները կարող են քննարկել Հայաստանի նկատմամբ հետագա համատեղ քայլերի հարցը։
«Ակնհայտ է, որ եթե մինչ այդ պահը հանրաքվեի կոչը չլսվի, առաջնորդները կհաշվի առնեն այդ փաստը՝ համապատասխան հետագա համատեղ քայլերը որոշելիս»,– ասել է Գալուզինը։
ՌԴ ԱԳ փոխնախարարը նշել է, որ Ռուսաստանի, Բելառուսի, Ղազախստանի և Ղրղզստանի նախագահների՝ մայիսի 29-ի համատեղ հայտարարությունում անդրադարձ է կատարվել Հայաստանի եվրոպական ձգտումներին։ Ըստ Գալուզինի՝ փաստաթղթում ընդգծվել է հնարավորինս սեղմ ժամկետներում հանրաքվե անցկացնելու անհրաժեշտությունը՝ ԵՄ-ին անդամակցելու կամ ԵԱՏՄ կազմում մնալու վերաբերյալ։
Միաժամանակ, հայտարարությունում հանրաքվեի անցկացման կոնկրետ ժամկետ չի նշվել։
Գալուզինի խոսքով՝ հարցը կրկին կքննարկվի ԵԱՏՄ բարձրագույն խորհրդի դեկտեմբերյան նիստում։ Այդ ընթացքում պետությունների ղեկավարներին կներկայացվի զեկույց՝ 2014 թվականի մայիսի 29-ի ԵԱՏՄ պայմանագրի՝ Հայաստանի նկատմամբ գործողությունը կասեցնելու հնարավոր հետևանքների վերաբերյալ։
ՌԴ ԱԳ փոխնախարարի հայտարարության համաձայն՝ հանրաքվեի հարցը և Հայաստանի հետ ԵԱՏՄ հարաբերությունների հետագա ընթացքը կարող են դառնալ դեկտեմբերյան քննարկումների առանցքային թեմաներից մեկը։
