Ռուսաստանը հույս ունի, որ Հայաստանում ընթացող ներքաղաքական գործընթացները կկազմակերպվեն օրենքի շրջանակում, իսկ քաղաքական գործընթացի բոլոր մասնակիցների իրավունքները կպահպանվեն։ Այս մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը՝ փոխանցում է «ՌԻԱ Նովոստի»-ն։
«Ես այժմ չէի ցանկանա մեկնաբանել Հայաստանում տեղի ունեցող ներքաղաքական իրադարձությունները։ Այնտեղ բավական բարդ գործընթացներ են ընթանում։ Կարելի է միայն հույս հայտնել, որ այն ամենը, ինչ տեղի է ունենում, կիրականացվի օրենքի խիստ համապատասխանությամբ, և կպահպանվեն հանրապետության քաղաքական գործընթացի բոլոր մասնակիցների իրավունքները»,- ասել է Պեսկովը։
