Կրեմլում չեն ​​բացառում Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի միջև հեռախոսազրույցի հնարավորությունը ամերիկացի բանակցողների այցի արդյունքներով, հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Մենք առայժմ չենք տիրապետում տեղեկության Կիևում ամերիկացի գործընկերների շփումների արդյունքների վերաբերյալ»,- լրագրողներին ասել է նա։

«Մենք չենք բացառում, որ կարող է կայանալ նախագահների միջև հեռախոսազրույց ամերիկացի բանակցողների այցի արդյունքներով»,- հավելել է Կրեմլի ներկայացուցիչը։

Նա խոստացել է ժամանակին տեղեկացնել լրագրողներին, թե երբ կկայանա զրույցը, եթե այն կազմակերպվի։

Պեսկովը նաև հայտարարել է, որ Ռուսաստանը «բարձր է գնահատում ամերիկացիների խաղաղարար ջանքերը», իսկ Պուտինը «անձնապես ասել է, որ շնորհակալ է Թրամփին խաղաղության նրա ձգտման համար»։