ՀԷՑ-ի ժամանակավոր կառավարիչ Ռոմանոս Պետրոսյանը ֆեյսբուքյան իր էջում գրել է․

Այցելել եմ Շիրակի մարզ, մարզը սպասարկող «Ղարս» մասնաճյուղ, «Գյումրի», «Ախուրյան» և «Անի» էլեկտրական ցանցեր, աշխատանքային խորհրդակցություն անցկացրել և շրջայց կատարել՝ տեղում ծանոթանալով իրականացված աշխատանքներին:

Աշխատանքային խորհրդակցության ընթացքում աշխատակազմին եմ ներկայացրել «Ղարս» մասնաճյուղի նորանշանակ ղեկավար Դավիթ Սարգսյանին: Հանդիպմանը ներկա է եղել նաև ՀՀ Շիրակի մարզպետ Դավիթ Առուշանյանը: Քննարկվել են մարզում իրականացվող ներդրումային ծրագրերը, նախանշվել են առաջիկա անելիքները, անդրադարձ է կատարվել նաև ցանցի արդյունավետ կառավարմանն առնչվող մի շարք հարցերի: Առաջիկայում «Ղարս» մասնաճյուղի գործունեության հիմնական ուղղությունները կլինեն կատարվող աշխատանքների նկատմամբ վերահսկողության բարձրացումը, ցանցի տեխնիկական և վարչական խնդիրների հասցեական լուծումը, աշխատակիցների համար արժանապատիվ աշխատանքային պայմանների ապահովումը, ինչպես նաև բաժանորդներին մատակարարվող էլեկտրաէներգիայի որակի բարելավումը:

Նախկինում անմխիթար վիճակում գտնվող «Ղարս» մասնաճյուղի վարչական շենքում իրականացվել են մեծամասշտաբ բարեկարգման աշխատանքներ, մասնավորապես վերանորոգվել են աշխատասենյակներ, սանհանգույցները, բարեկարգվել են պահեստային տարածքները: Էլեկտրական ցանցերի մնացած վարչական շենքերը ևս բարեկարգվելու են, քանի որ ՀԷՑ-ի աշխատակիցների համար արժանապատիվ աշխատանքային պայմանների ապահովումը առաջնահերթություն է:

Վերջին մեկ տարվա ժամանակավոր կառավարման շրջանում իրականացվել են լայնածավալ ներդրումային ծրագրեր, որոնց արդյունքում միայն Շիրակի մարզում.

փոխարինվել է ավելի քան 40 կմ հնամաշ օդային գիծ,

կառուցվել է 12 կմ բարձր և ցածր լարման մալուխային գիծ,

փոխարինվել և տեղադրվել է 705 հենասյուն,

փոխարինվել է 36 ուժային տրանսֆորմատոր,

իրականացվել են ՀԷՑ-ի բաշխման ցանցին 300 նոր բաժանորդների միացման աշխատանքներ: