Երևանի ընդհանուր իրավասության դատարանում այսօր հրապարակվեց ՊԵԿ նախկին նախագահ Գագիկ Խաչատրյանին կալանավորելու վերաբերյալ դատախազության միջնորդության մասին որոշումը։ 

Դատարանը մերժեց Գագիկ Խաչատրյանին կալանավորելու դատախազության միջնորդությունը` հաշվի առնելով հանգամանքները, որ Գագիկ Խաչատրյանի մոտ առկա են բազմաթիվ հիվանդություններ, և դատարանը ամբաստանյալի բացակայությունները ոչ հարգելի չի համարել։

Նշենք, որ նախորդ դատական նիստին մեղադրող դատախազը հանդես էր եկել Գագիկ Խաչատրյանին կալանավորելու մասին միջնորդությամբ։ Ըստ մեղադրողի՝ քրեական գործը դատարան է ուղարկվել դեռևս 2020-ի օգոստոսին, այս տարվա ընթացքում նշանակվել է 14 դատական նիստ, որոնք չեն կայացել։ Ընդ որում, հիշատակված նիստերից 12-ը հետաձգվել են ամբաստանյալ Գագիկ Խաչատրյանի վատառողջ լինելու պատճառաբանությամբ, 1 նիստ՝ նշանակված 09.06.2023թ., պաշտպան Երեմ Սարգսյանի չներկայանալու պատճառով և 1 նիստ՝ նշանակված 22.11.2023թ. ամբաստանյալների կողմից հարցաքննությանը պատրաստ չլինելու պատճառով․ «Սույն գործի դատաքննության ընթացքում արդեն կանխատեսելի դարձած մեղադրյալ Գագիկ Խաչատրյանի նմանօրինակ դատավարական վարքագծի դրսևորումը միտված է բացառապես դատական նիստերին չներկայանալուն և դատական նիստերն անվերջ ձգձելուն»։

Գագիկ Խաչատրյանը և իր եղբորորդի  Կարեն Խաչատրյանը մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար։
 
Հերթական նիստը տեղի կունենա հունվարի 8-ին ժամը 11-ին։