Այսօր՝ ժամը 17.00-ին, Հակակոռուպցիոն (քրեական) դատարանում տեղի կունենա նախկին նախագահ Սերժ Սարգսյանի փեսա, Սուրբ Աթոռում ՀՀ արտակարգ և լիազոր նախկին դեսպան, հետախուզման մեջ գտնվող Միքայել Մինասյանի վերաբերյալ քրեական վարույթի նախնական դատալսումներով երկրորդ դատական նիստը։ Այս մասին Civic.am-ը տեղեկացավ datalex.am կայքից։ Նշենք, որ դատախազը 2023 թ. նոյեմբերի 29-ին հաստատել էր Միքայել Մինասյանի նկատմամբ հեռակա վարույթի մեղադրական եզրակացությունը և վարույթի նյութերի հետ հանձնել Հակակոռուպցիոն դատարան՝ հեռակա դատաքննության: Գործը դատարանն ստացել էր դեկտեմբերի 4-ին, դատավոր՝ Տիգրան Դավթյան։ Նշենք, որ սույն գործով մեղադրյալի նկատմամբ խափանման միջոց չի ընտրվել։
Նախորդ դատական նիստը, հիշեցնենք, դեկտեմբերի 18-ին էր, սակայն այն չկայացավ պաշտպանական կողմի չներկայանալու պատճառով։ Պաշտպաններ Բենիկ Գալստյանն ու Տիգրան Ղազարյանը դատարան գրություն էին մուտքագրել և խնդրել նիստը հետաձգել, քանի որ ծանրաբեռնված են այլ՝ նախապես նշանակված դատական նիստով։ Ուշագրավ է, որ մինչ դատարանը կքննի սույն գործը, «փեսա Միշիկը» հրապարակախոսական հոդվածներով է հանդես գալիս և շաբաթներ առաջ իր տելեգրամյան ալիքում անդրադարձել էր Ուկրաինային, թե՝ «ինչպե՞ս և ինչու՞ Ուկրաինան հայտնվեց արյունոտ մսաղացի մեջ և ո՞վ կփոխարինի Զելենսկուն»։
Միքայել Արայի Մինասյանը, ըստ վերոհիշյալ կայքում հրապարակված մեղադրական եզրակացության համառոտ նկարագրության, 2008 թվականից մինչև 2012 թվականը զբաղեցնելով ՀՀ նախագահի աշխատակազմի ղեկավարի առաջին տեղակալի պաշտոնը, իսկ 2013 թվականից մինչև 2018 թվականը հանդիսանալով ՀՀ դիվանագիտական ներկայացուցիչ՝ Սուրբ Աթոռում ՀՀ արտակարգ և լիազոր դեսպան, որպիսի հանգամանքներով պայմանավորված՝ լինելով պաշտոնատար անձ, «Հանրային ծառայության մասին» (ընդունվել է 26.05.2011թ., ուժը կորցրել է 20.11.2019թ.) և «Դիվանագիտական ծառայության մասին» ՀՀ օրենքներով սահմանված՝ ձեռնարկատիրական գործունեություն իրականացնելու արգելքին հակառակ՝ մինչև 2016 թվականն ինչպես անձամբ, այնպես էլ իր մտերիմներ Արմեն Պետրոսյանի և Լեոնիդ Արևշատյանի միջոցով մասնակցել է 2010 թվականին հիմնադրված՝ ձեռնարկատիրական գործունեություն իրականացնող ընկերության կառավարմանը՝ օրինականացնելով հիշյալ ապօրինի գործունեության արդյունքում հանցավոր ճանապարհով ստացված առանձնապես խոշոր չափերով գույքը:
Այսպես. ՀՀ կառավարության 2001 թվականի մայիսի 21-ի թիվ 435-Ն որոշմամբ՝ ՀՀ էներգետիկայի նախարարության «Հայէներգանորոգում» ՓԲ ընկերության գույքի կազմից առանձնացված «ՁորաՀԷԿ» տեղամասի՝ պետական սեփականություն հանդիսացող գույքի ներդրմամբ ստեղծվել է «ՁորաՀԷԿ» ՓԲ ընկերությունը, որի բաժնետոմսերի կառավարման լիազորությունը ՀՀ կառավարության 2002 թվականի հունվարի 15-ի թիվ 36-Ն որոշմամբ վերապահվել է ՀՀ պաշտպանության նախարարությանը:
2010 թվականի դեկտեմբերի 16-ին ՀՀ պաշտպանության նախարարության կողմից մշակվել է ««ՁորաՀԷԿ» փակ բաժնետիրական ընկերության կողմից գույքի օտարման խոշոր գործարք կնքելուն հավանություն տալու մասին» ՀՀ կառավարության գաղտնի որոշման նախագիծը, որով առաջարկվել է թույլատրել պաշտպանության նախարարությանը հավանություն տալու խոշոր գործարքի կնքմամբ՝ 3.600.000.000 ՀՀ դրամ գումարով ընկերության գույքի օտարմանը Միքայել Մինասյանին փոխկապակցված անձանց՝ Արմեն Պետրոսյանի և Լեոնիդ Արևշատյանի կողմից բրիտանական Վիրջինյան կղզիներում հաշվառված «Էմ Ջի Դի Սի ինք» առևտրային ընկերության և «Վոդ Գրուպ» ՍՊ ընկերության միջոցով 2010 թվականի հոկտեմբերի 27-ին Հայաստանի Հանրապետությունում հիմնադրված և փաստացի Միքայել Մինասյանի կողմից ղեկավարվող «Ձորագետ Հիդրո» ՍՊ ընկերությանը:
Ներկայացված նախագիծը գաղտնի ընթացակարգով քննարկվել է ՀՀ կառավարության 2010 թվականի դեկտեմբերի 16-ի նիստում, և ընդունվել է թիվ 1660-Ն որոշումը, որի հիման վրա 2010 թվականի դեկտեմբերի 20-ին կնքված գույքի առուվաճառքի պայմանագրով «ՁորաՀԷԿ» ՓԲ ընկերության 4.646.400.000 ՀՀ դրամ շուկայական արժեքով գույքը 3.600.000.000 ՀՀ դրամով օտարվել է «Ձորագետ Հիդրո» ՍՊ ընկերությանը:
2012-2016 թվականների ընթացքում «Ձորագետ Հիդրո» ՍՊ ընկերության հիդրոէլեկտրակայանից արտադրված և առաքված էլեկտրաէներգիայի վաճառքի համար սահմանվել են կրկնակին գերազանցող սակագներ: «Ձորագետ Հիդրո» ՍՊ ընկերության կողմից ՀՀ–ում էլեկտրաէներգիա սպառող ֆիզիկական և իրավաբանական անձանցից հավելյալ ստացվել է 3 մլրդ 750 մլն 837 հազար 591 դրամ:
Մինասյանը քողարկել է ընկերության 30 տոկոս բաժնեմասերի իրական շահառու հանդիսանալու հանգամանքը, որի արդյունքում 2011-2016 թվականների ընթացքում ստացել է 1 մլրդ 113 մլն 698 հազար 628 դրամ շահաբաժին:
Հ․Մ․
