«Դիմումների ուսումնասիրությունները ցույց են տալիս, որ հիմնականում գործատուների չտեղեկացվածության հետևանքով են տեղի ունեցել աշխատանքային օրենսդրության խախտումներ, այդ իսկ պատճառով տեսչական մարմինը մշտապես խախտումները կանխարգելելու նպատակով կանխարգելիչ գործունեություն է իրականացնում հատկապես 2021 թվականի հուլիսի 1-ին լիազորությունները վերապահելուց հետո»,- աշխատանքային իրավունքի ոլորտում ԱԱՏՄ-ին վերապահված նոր լիազորությունները թեմայով ասուլիսի ժամանակ ասաց ԱԱՏՄ աշխատանքային օրենսդրության իրավական վերահսկողության բաժնի պետ Ալվարդ Արշակյանը:

Նա նշեց, որ տեսչական մարմնին հասու բոլոր միջոցներով, այդ թվում նաև պաշտոնական կայքէջի միջոցով, իրազեկվում են և՛ աշխատողները, և՛ գործատուները իրենց իրավունքների և պարտականությունների մասին։

Ասուլիսին ներկա ԱԱՏՄ աշխատողների առողջության պահպանման և անվտանգության ապահովման վերահսկողության բաժնի պետ Աշոտ Հարությունյանն էլ նշեց, որ եթե խոսքը վերաբերում է ՀՀ-ում ստուգումների կազմակերպման անցկացման մասին օրենքի հիման վրա կատարվող ստուգումներին, ապա տեսչական մարմինն ունի հաստատված երկու ստուգաթերթ. դա հանքարդյունաբերության բնագավառում և մշակող արդյունաբերության բնագավառում կառավարության որոշումներով հաստատված ստուգաթերթերն են։

«Այսինքն՝ ստուգումներն իրականացվում են միայն այդ ստուգումների ստուգաթերթերի հիման վրա՝ տարեկան ծրագրով, բայց միևնույն ժամանակ մենք ունենք օրենքով նախատեսված ընթացակարգեր, որը հնարավորություն է տալիս համապատասխան օրենքով սահմանված համապատասխան հիմքերի դեպքում իրականացնելու նաև ըստ անհրաժեշտության ստուգումներ։ Բայց միայն այսօր այդ ստուգումները կարող են իրականացվել այդ երկու բնագավառներում, մյուս ստուգաթերթերը գտնվում են քննարկումների շրջանառության փուլում»,- ասաց Աշոտ Հարությունյանը։

Մանրամասները՝ տեսանյութում։