Միշուստինը նոյեմբերի 18-19-ը կայցելի Երևան
Ռուսաստանի վարչապետ Միխայիլ Միշուստինը հինգշաբթի` երկօրյա աշխատանքային այցով կմեկնի Հայաստան։ ՌԴ նախարարների կաբինետի ղեկավարը Երևանում կմասնակցի Եվրասիական տնտեսական միության (ԵԱՏՄ) միջկառավարական խորհրդի նիստին, հաղորդում է TASS-ը՝ վկայակոչելով ՌԴ կառավարության մամուլի ծառայությունը:

«2021 թվականի նոյեմբերի 18-19-ը Երևանում ՌԴ վարչապետ Միխայիլ Միշուստինը կմասնակցի Եվրասիական միջկառավարական խորհրդի հերթական նիստին։ Առաջիկա հանդիպումը կլինի 29-րդը՝ ԵԱՏՄ-ի 2015 թվականի հունվարի 1-ից ի վեր և չորրորդը՝ այս տարի։

Նախորդ հանդիպումները տեղի են ունեցել 2021 թվականի փետրվարի 5-ին Ալմաթիում, 2021 թվականի ապրիլի 29-30-ը՝ Կազանում և օգոստոսի 19-20-ը՝ Ղրղզստանի Չոլպոն-Աթայում։ Հանդիպմանը, բացի Հայաստանի, Բելառուսի, Ղազախստանի, Ղրղզստանի և Ռուսաստանի վարչապետներից, որպես ԵԱՏՄ դիտորդ պետություններ կմասնակցեն Ուզբեկստանի և Կուբայի ներկայացուցիչները։

Հանդիպման օրակարգում ընդգրկված են ԵԱՏՄ շրջանակներում ինտեգրման խորացման հրատապ խնդիրներ։ «Հատուկ ուշադրություն է դարձվելու ներքին շուկայի գործունեությանը, ագրոարդյունաբերական համալիրի զարգացմանը, մետալուրգիական ձեռնարկությունների հումքի մատակարարմանը, ինչպես նաև միության անդամ երկրներին դեղամիջոցներով և դեղագործական նյութերով ապահովելուն։
Նիստին կդիտարկվեն ԵԱՏՄ անդամ երկրների խնդիրները կլիմայական գլոբալ օրակարգի համատեքստում»,- պարզաբանել են ՌԴ նախարարների կաբինետի մամուլի ծառայությունում։

Կայքի տեղեկություններով՝ կառավարությունների ղեկավարները ծրագրում են լսել զեկույցներ ԵԱՏՄ-ում նավիգացիոն կնիքների կիրառման մասին համաձայնագրի շուրջ տարվող աշխատանքների ընթացքի վերաբերյալ՝ ուղղված բեռնափոխադրումներին հետևելուն և միության ներքին շուկայում սահմանափակումները վերացնելուն։ Առանձնահատուկ ուշադրություն է դարձվելու Չինաստանից ԵԱՏՄ ներմուծվող գրաֆիտային էլեկտրոդների նկատմամբ հակադեմփինգային միջոցների սահմանման հարցին: Կառավարությունների ղեկավարների քննարկման համար կներկայացվի նաև Եվրասիական տնտեսական միության անդամ երկրների մետալուրգիական ձեռնարկություններին հումքի մատակարարման գործողությունների ծրագիր 2021-2024 թվականների համար։

ԵԱՏՄ միջկառավարական խորհրդի նիստից հետո նախատեսվում է որոշումների ստորագրում, որոնք նախատեսում են եվրասիական տնտեսական ինտեգրման հետագա զարգացումը։ Մասնավորապես, համաձայնագիր կստորագրվի Եվրասիական տնտեսական միության շրջանակներում վարկային պատմություններում ներառված տեղեկատվության փոխանակման կարգի վերաբերյալ։

TASS-ը հավելում է, որ Միշուստինի առաջիկա այցը տեղի է ունենալու հայ-ադրբեջանական սահմանին իրավիճակի սրման ֆոնին:

Սյուզի Սիրականյան