«Նախատեսում ենք, որ ցածր ռիսկայնություն ունեցող, բարեխիղճ տնտեսվարողների համար կներդրվի նախնական հայտարարագրերի լայնորեն կիրառման պրակտիկան։  Սա հնարավորություն է տալու տնտեսվարողներին սահմանին մաքսային հսկողությունը իրենց նկատմամբ գրեթե դարձնել աննկատ։ Այսինքն՝ տնտեսվարողը կլրացնի նախնական հայտարարագիր, կներկայացնի և սահմանից արդեն կկարողանա տնօրինել իր ապրանքը»,- այսօր՝ փետրվարի 2-ին, «Արմենպրեսս»-ի կազմակերպած ասուլիսի ժամանակ ասաց ՀՀ ՊԵԿ նախագահի տեղակալ Ծովինար Սողոմոնյանը՝ խոսելով մաքսային ծառայության բարեփոխումներից։ 

«Բացի սրանից, նախատեսվում է, որ մաքսային հայտարարագրերի գործընթացը ամբողջությամբ էլեկտրոնային եղանակով կկազմակերպվի, և տնտեսվարողները ստիպված չեն լինի հայտարարագրերի շտկման համար այցելել մաքսային մարմիններ։ Կոնկրետ մաքսային ծառայողին տնտեսվարողի ներմուծման հետ կապված ցուցումը տրվելու է էլեկտրոնային համակարգի միջոցով, օրինակ՝ կարմիր ուղու դեպքում բեռի զննում կամ դեղին ուղու դեպքում՝ փաստաթղթի զննում, իսկ կանաչ ուղու դեպքում՝ առանց հսկողության ապրանքները կանցնեն սահմանը»,- նշեց ՊԵԿ նախագահի տեղակալն ու ընդգծեց, որ սա կնպաստի ապրանքաշրջանառության դյուրինացմանը և տնտեսվարողների համար կխնայի ֆինանսական ռեսուրսներ։