1998-ին տեղի է ունեցել աղետալի սխալ՝ Արցախը դուրս է թողնվել բանակցային գործընթացից. Եթե դա չլիներ, ԼՂ հարցը վաղուց կարգավորվել էր. Փաշինյան
Բաժանորդագրվեք մեզ նաև
Տելեգրամում
ՀՀ վարչապետ Նիկոլ Փաշինյանը Հանրային հեռուստաընկերությանը տված հարցազրույցում դիտարկմանը, որ Սոչիի հանդիպումից առաջ ՀՀ վարչապետը արցախյան պատվիրակությունից ընդունել է միայն Արայիկ Հարությունյանին, ասաց. «Ինչ-որ փաստական սխալ կա. ես ընդունել եմ Արցախի պատվիրակությանը՝ Արայիկ Հարությունյանի գլխավորությամբ: Բայց մենք ԼՂ նախագահ Արայիկ Հարությունյանի հետ այս ընթացքում տասնյակ հանդիպումներ ենք ունեցել և ունենում: Մենք ամեն ինչ չէ, որ լուսաբանում ենք»:
Նիկոլ Փաշինյանն ընդգծեց. «2018 թվականից որևէ բանակցության մեջ իմ արտասանած որևէ նախադասություն չկա, որից ԼՂ իշխանությունը տեղյակ չէ: Ամեն բանակցությունից առաջ և հետո Արայիկ Հարությունյանի հետ զրույց ենք մենք ունենում: Ինչ ես եմ փոխանցում Արայիկ Հարությունյանին, նա էլ իր հերթին փոխանցում է ԼՂ քաղաքական վերնախավին»:
Անդրադառնալով Արցախի խորհրդարանում ընդունված հայտարարությանը և հարցին՝ հակասություն չկա՞, երբ Արցախը ակնկալում է, որ Հայաստանը պետք է պաշտպանի իր շահերը, իսկ Հայաստանի կարծիքով՝ Արցախը պետք է առանձին բանակցի Ադրբեջանի հետ, ՀՀ վարչապետ Նիկոլ Փաշինյանը պատասխանեց. «Ոչ, հակասություն չկա իրականում, եթե հակասություն կա, այդ հակասությունն առաջացել է մի շատ մեծ սխալի հետևանքով, որ 1998 թվականին Արցախը դուրս է թողնվել բանակցային պրոցեսից. դա աղետալի սխալ էր, որի հետևանքները մինչ օրս կրում ենք: Արցախը պետք է լինի միակ խոսողը ԼՂ խնդրի կարգավորման և ԼՂ հայության իրավունքների պաշտպանության վերաբերյալ: Այո, ես շարունակում եմ մտածել այդպես, որ, այո, ԼՂ ներկայացուցիչները պետք է լինեն խոսակցության կողմ. սա ԼՂ մեր հայրենակիցների իրավունքները պաշտպանելու լավագույն ձևն է: Այո, մենք կարծում ենք, որ ԼՂ-ի և Ադրբեջանի միջև պետք է տեղի ունենա երկխոսություն: Ավելին ասեմ՝ եթե 1998-ին ԼՂ-ն բանակցային գործընթացից դուրս թողնված չլիներ, ԼՂ հարցը վաղուց կարգավորվել էր»:
Վարչապետի համոզմամբ՝ ԼՂ մեր հայրենակիցների հաջողության գրավականը այնտեղ ապրելն է, այնտեղ աշխատելն ու արարելը. «Եվ ՀՀ-ն բոլոր հնարավոր պայմանները ստեղծում է դրա համար. ԼՂ բյուջեն իր ողջ պատմության մեջ երբեք չի եղել այնքան, որքան այսօր է»:
