«Արցախում կան պացիենտներ, ովքեր ծանր առողջական խնդիրներ ունեն, և այդ առողջական խնդիրները հնարավոր չէ լուծել Արցախի բժշկական կենտրոններում, անհրաժեշտ են նեղ մասնագիտական խորհրդատվություն, սարքավորումներ, և այս խնդիրը հրատապ է լուծման համար։ Անհրաժեշտ է րոպե առաջ վերականգնել Հայաստանի և Արցախի բնականոն կապը»,- այսօր՝ դեկտեմբերի 22-ին, լրագրողների հետ ճեպազրույցի ժամանակ ասաց առողջապահության նախարար Անահիտ Ավանեսյանը։

«Առողջապահության համաշխարհային կազմակերպության հետ կապի մեջ ենք, ունենք պատասխան։ Բայց միայն պաշտոնական գրագրությամբ չի իրականացվում աշխատանքը, նաև ամենօրյա կապի մեջ եմ և տեղեկատվություն եմ փոխանցում թե իրավիճակի, թե պացիենտների մասին, ինչպես նաև մանկահասակ երեխաներին  անհրաժեշտ դեղորայքով, մանկական կերերով ապահովման խնդրի մասին»,- նշեց Անահիտ Ավանեսյանն ու ընդգծեց. «Պահանջատեր ենք, որ միջազգային կառույցները ճնշում բանեցնեն և այս կրիտիկական իրավիճակին ուղղված քայլեր ձեռնարկեն»։