Կառավարության վաղվա նիստի օրակարգում ընդգրկված հարցերից է  «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետությունում Ռուս-Հայկական համալսարանի գործունեության պայմանների մասին» նոր համաձայնագրի  ստորագրման առաջարկությանը հավանություն տալուհարցը։ Civic.am-ը նախագծին կից հիմնավորումից մասնավորապես տեղեկացավ, որ «Համաձայնագրի ստորագրման նպատակահարմարությունը թելադրված է այն փաստով, որ Հայաստանում ռուսաց լեզվի դերն ու տեղը որոշվում է պատմական գործոններով և ռուսերենն անհրաժեշտ է մշակութային կապերի պահպանման և համակողմանի համագործակցության ընդլայնման համար, ինչպես նաև Ռուս-Հայկական համալսարանի շրջանավարտների գերազանց ռուսերենի տիրապետումը մրցակցային առավելություն է աշխատաշուկայում»։  

Նոր Համաձայնագրի նախագծում, ըստ կից հիմնավորման,  կատարվել են որոշակի հստակեցումներ․ մասնավորապես առավել հստակ ձևակերպված են Համալսարանի կառավարման սկզբունքային մոտեցումները, կիրառվել է կրթական ծրագրերի իրականացման հավասար մոտեցման սկզբունքը՝ ՀՀ և ՌԴ օրենսդրությանը համապատասխան: Համաձայնագրի նախագծով նախատեսվում է, որ «Ռեկտորն ընտրվում է Կառավարման ​​խորհրդի կողմից Կանոնադրությանը համապատասխան և պաշտոնում հաստատվում է Լիազորված մարմինների համատեղ հրամանով մինչև 5 տարի ժամկետով: Նույն անձը չի կարող զբաղեցնել Ռեկտորի պաշտոնը ավելի քան 2 ժամկետ անընդմեջ։ Ռեկտորի հետ աշխատանքային հարաբերությունները կարգավորվում են Ռեկտորի և որպես գործատու հանդես եկող ու Համալսարանի Հիմնադիրների անունից գործող Հայկական Կողմից Լիազորված մարմնի միջև կնքված աշխատանքային պայմանագրով»: Նոր Համաձայնագրով առավել հստակ ձևակերպված է ՀՀ և ՌԴ դերի և ազդեցության ուժեղացումը համաշխարհային հումանիտար և գիտատեխնիկական ոլորտներում, Կողմերի պետությունների դրական իմիջի փոխադարձ ամրապնդումը, ընդհանուր մշակութային, կրթական և գիտական տարածքի ամրապնդումը: Հստակ ձևակերպված են նաև Համալսարանի ընդունելության կանոնները և ակադեմիական իրավունքները, ազատությունները:

Նշենք, որ Ռուս-Հայկական համալսարանը հիմնադրվել է 1997թ. օգոստոսի 29-ին ստորագրված «Հայաստանի Հանրապետության կառավարության և Ռուսաստանի Դաշնության կառավարության միջև Երևան քաղաքում Ռուս-Հայկական համալսարանի հիմնադրման և գործունեության պայմանների մասին» համաձայնագրի հիման վրա: Համալսարանի  ռեկտրը 2023 թ․ հուլիսի 8-ից  հիշյալ կրթական հաստատությունում  տարբեր պաշտոններ զբաղեցրած, պրոֆեսոր Էդվարդ Սանդոյանն է։

Նախկին ռեկտորը (2001-ից 2023-ը)  տնտեսագիտական գիտությունների դոկտոր, պրոֆեսոր, ՀՀ ԳԱԱ թղթակից անդամ Արմեն Դարբինյանն էր։