vՌԴ ԱԳ նախարարը հայտարարել է, որ հենց Հայաստանն է սաբոտաժի ենթարկում Սյունիքի մարզով կոմունիկացիաների ապաշրջափակման պայմանավորվածությունը։

ՀՀ ԱԳՆ-ից էլ  ի պատասխան վերջինիս հայտարարության արձագանքել են. «Հայաստանի վերաբերյալ ՌԴ ԱԳ նախարարության զանազան պաշտոնյաների՝ իրականությանը չհամապատասխանող, ակնհայտորեն կողմնակալ, հաճախ անհարգալից մեկնաբանությունները, ցավոք, վաղուց արդեն նորույթ չեն, և եթե նկատել եք, տևական ժամանակ է, ինչ մենք անգամ չենք անդրադառնում դրանց:

Այնուամենայնիվ, չենք կարող չասել, որ ՌԴ արտաքին քաղաքական գերատեսչության ղեկավարի երեկվա հայտարարությունը ոչ միայն զուտ ափսոսանք է առաջացնում, այլև կասկածի տակ է դնում Հայաստանի և Ադրբեջանի միջև հարաբերությունների կարգավորման գործընթացում Ռուսաստանի Դաշնության կառուցողական ներգրավվածությունը»։

Մարիա Զախարովան էլ, արձագանքելով ՀՀ ԱԳՆ-ին, ասել է հետևյալը. «Սա պաշտոնական Երևանի հերթական օրինակն է՝ սեփական սխալների և ռազմավարական սխալ հաշվարկների համար մեղադրել ուրիշներին, տվյալ դեպքում Ռուսաստանին»։

Թեմայի վերաբերյալ Civic.am-ը զրուցել է քաղաքագետ, Փարիզի քաղաքագիտության կենտրոնի փորձագետ Կայծ Մինասյանի հետ։ 

«Ռուսաստանն իր ուզածը չի կարող իրականացնել Հարավային Կովկասում, զինադադարից հետո։ Բայց եթե նույնիսկ իր համար դրական բաներ կան Վրաստանում, անորոշ է Ռուսաստանի ապագան տարածաշրջանում, որովհետև նախ՝ շուտով Վրաստանում պետք է տեղի ունենան ընտրություններ, և ոչ մեկը չգիտի, թե ով կհաղթի, բայց ըստ երևույթին ժողովուրդն ավելի եվրոպամետ է, քան այսօրվա իշխանությունը։ Երկրորդ՝ Հայաստանում ընդդիմադիր ուժերը, նախկին իշխանությունները և սրբազանը չեն կարող մեծ ալիք կամ մեծ շարժում ստեղծել՝ պաշտպանելու համար Ռուսաստանի շահերը։ Չստացվեց իրենց ուզածը։ Երրորդ՝ Ադրբեջանում ինչ որ կպատահի, խանգարում է Ռուսաստանին։ Եվ չորրորդ՝ Ուկրաինայի ԶՈՒ վերջին գործողությունները Կուրսկում, և տեսանք Ռուսաստանի անօգնականությունը»,- ասաց Կայծ Մինասյանը։

  Խոսելով նաև այն մասին, որ ՌԴ նախագահ Վլադիմիր Պուտինը  Բաքվում Ալիևի հետ հանդիպումից հետո հայտարարել է, թե  Մոսկվան պատրաստ է մասնակցել Բաքվի և Երևանի միջև հարաբերությունների կարգավորմանը այն մասով, որը կպահանջվի երկու կողմերից, Կայծ Մինասյանն ասաց, որ Ռուսաստանը փորձում է իր ներկայությունը հզորացնել տարածաշրջանում, քանի որ գիտի՝ Ադրբեջանը և Հայաստանն այլևս Ռուսաստանի կարիքը չունեն, ինչպես որ ուզում է Ռուսաստանը։   

«Պուտինը, որ գնաց Բաքու, մի տեսակ թուլացած նախագահ է, որովհետև գնաց ստուգելու՝ Ալիևն իր գործընկե՞րն է, թե՞ ոչ։ Էլ ուր պիտի գնա՝ բացի Ադրբեջանից, Հյուսիսային Կորեայից և Չինաստանից։ Բայց նայեք, Չինաստանը, Իրանը, Թուրքիան՝ Ռուսաստանի բարեկամները, կասկած ունեն Ռուսաստանի հարցում։ Նա Բաքու գնաց ոչ միայն  միջանցքի պատճառով, այլև կուզեր ճշտել՝ արդյոք ազդեցություն ունի՞ տարածաշրջանի վրա, թե՞ ոչ։ Հետո, Ռուսաստանի և Ադրբեջանի միջև գազի պայմանագիրը շարունակվո՞ւմ է, թե՞ ոչ։ Անշուշտ պետք է շարունակվի, բայց մարդը կուզի ավելի հեռուն գնալ»,- ասաց Կայծ Մինասյանը։   

Լիլիթ Թադևոսյան