Քաղաքացիակենտրոն լրատվություն
Բելառուսում բացվել են ընտրատեղամասերը նախագահի ընտրության հիմնական օրվա քվեարկության համար:
Երկրի ԿԸՀ-ից հայտնել են՝ ընտրատեղամասերը բաց են լինելու ժամը 8:00-ից 20:00-ն, Բելառուսի գործող նախագահ Ալեքսանդր Լուկաշենկոն արդեն հասցրել է գնալ ընտրատեղամաս և քվեարկել, նրան ուղեկցել է իր շունը։
Հանրապետության նախագահի պաշտոնի համար հավակնում է Կենտրոնական ընտրական հանձնաժողովի գրանցած հինգ թեկնածու, այդ թվում՝ Ալեքսանդր Լուկաշենկոն:
Նա երկրի նախագահի պաշտոնը զբաղեցնում է 1994 թվականից և հավակնում է յոթերորդ անգամ զբաղեցնել պետական բարձրագույն պաշտոնը:
Բելառուսի տարածքում գործում է 5325 ընտրատեղամաս։
Հիշեցնենք՝ հունվարի 21-25-ը Բելառուսում տեղի է ունեցել նախագահի վաղաժամկետ քվեարկություն։
Բելառուսի Հանրապետության նախագահի ընտրությունում քվեարկել է ընտրացուցակներում ընդգրկված քաղաքացիների 41,81%-ը։
2025 թվականին երկրում ընտրական ցուցակներում ներառված է ավելի քան 6,9 մլն մարդ:
Եվրախորհրդարանը բանաձև էր ընդունել, որով կոչ էր անում Եվրամիությանը չճանաչել Բելառուսում կայանալիք նախագահի ընտրության արդյունքները և նոր պատժամիջոցներ սահմանել հանրապետության իշխանությունների դեմ:
