Հայաստանի մի շարք մարզերում և Երևանի բարձրադիր գոտիներում ձյուն է գալիս, կան փակ և դժվարանցելի ճանապարհներ։
Ինչպես տեղեկացնում է ՀՀ ՆԳՆ փրկարար ծառայությունը, ձյուն է գալիս Լոռու, Շիրակի մարզերում, Հրազդան, Աբովյան, Չարենցավան, Ծաղկաձոր, Գավառ, Վարդենիս, Ճամբարակ, Բերդ քաղաքներում, Թալինի, Ապարանի և Արագածի տարածաշրջաններում
Փակ են Արագածոտնի մարզում «Ամբերդ» բարձր լեռնային օդերևութաբանական կայանից Քարի լիճ և Ամբերդ ամրոց տանող ավտոճանապարհները։
Դիլիջանի ոլորանները փակ են բեռնատարների համար։
Սպիտակի և Ստեփանավանի ոլորանները փակ են բեռնատարների համար, դժվարանցանելի՝ մյուս տեսակի տրանսպորտային միջոցների համար։
Սյունիքի բարձրադիր գոտիներում մառախուղ է։
Հիդրոօդերևութաբանության և մոնիտորինգի կենտրոնի փոխտնօրեն Գագիկ Սուրենյանը ֆեյսբուքյան էջում գրել է, որ օդի ջերմաստիճանը մարտի 24-29-ին հանրապետության ամբողջ տարածքում այսօրվա համեմատ աստիճանաբար կբարձրանա 11-15 աստիճանով։
