Նոր ուսումնական տարվանից այն դպրոցները, որոնք չունեն հարմարություններ հաշմանդամություն ունեցող երեխաների ուսումը պատշաճ կազմակերպելու համար, կստանան համապատասխան ֆինանսավորում։

Կրթության, գիտության, մշակույթի ու սպորտի նախարարի տեղակալ Արաքսյա Սվաջյանի խոսքով՝  ներդրվում է հանրակրթական դպրոցների ֆինանսավորման նոր մոդել, որտեղ ներառական կրթության ֆինանսավորման մոտեցումներում զգալի փոփոխություն է եղել։
«Բոլոր այն դպրոցները, որոնք նոր չեն կառուցվել կամ վերակառուցվել վերջին տարիների ընթացքում, և որոնցում առկա չեն հարմարեցումներ՝ մատչելիության ապահովման համար, ստանալու են շուրջ 3 մլն դրամ, որը պետք է ուղղեն շենքի պայմանների բարելավմանը»,- ասում է ԿԳՄՍ փոխնախարարը։

Արաքսյա Սվաջյանը նշում է՝ ավելի քան 20 տարի է, ինչ իրականացվում է ներառական կրթություն, սակայն դպրոցների շենքային պայմանները հարմար չեն որևէ տեսակի հաշմանդամություն ունեցող երեխայի համար։ Ֆինանսավորման նոր մոդելով ֆինանսավորում է հատկացված նաև խելամիտ հարմարեցումների համար. «Օրինակ՝ թույլ տեսողություն ունեցող երեխայի սեղանին պետք է դրված լինի խոշորացույց, կամ համապատասխան լուսավորություն լինի, գրելու կամ ընթերցանության դժվարություն ունեցող երեխայի սեղանին՝ հատուկ քանոններ կլինեն, որոնք հնարավորություն կտան ավելի հստակ տեսնել ընթերցվող հատվածը»։ 

Ֆինանսավորման հաջորդ փոփոխությունը վերաբերում է հաստիքներին: «Համընդհանուր ներառական կրթության ներդրման համատեքստում բոլոր դպրոցներում ներդրվել են ուսուցչի օգնականի հաստիքներ, որոնք աշխատում են բոլոր երեխաների հետ, աջակցում ուսուցչին՝ դասն ավելի ինտերակտիվ դարձնելու համար»,- ասում է փոխնախարարն ու ընդգծում, որ դպրոցներում 110 երեխայի դեպքում կլինի մեկ ուսուցչի օգնականի հաստիք։ 

Սեպտեմբերից հանրակրթական բոլոր դպրոցները կունենան նաև հոգեբաններ, նրանք կզարգացնեն երեխաների ինքնադրսևորումն ու ինքնարտահայտումը։ 

Նարա Մարտիրոսյան

Մանրամասն՝ տեսանյութում