Ադրբեջանական ծագումով հայտնի ռուս բլոգեր Սուբհան Մամեդովը (Սուբո) անցնում է քրեական գործով։ Այս մասին հայտնել են ռուսական ԶԼՄ-ները։

Նշվում է, որ Մոսկվայի մարզի քննչական կոմիտեն քրեական գործ է հարուցել ֆիզիկական անձի կողմից առանձնապես խոշոր չափերի հարկերից խուսափելու և հանցավոր ճանապարհով ձեռք բերված փողերի լվացման հոդվածներով։ Մամեդովին սպառնում է մինչև 10 տարվա ազատազրկում։

Հետաքննությունը կարծում է, որ 2020-ից 2022 թվականներին բլոգերը և նրա հարազատները կառուցել են հարկերից խուսափելու սխեմա. միլիոնավոր ռուբլի եկամուտներ ունենալով՝ Սուբհանը չի գրանցել անհատական ձեռնարկատիրություն կամ իրավաբանական անձ։ Ֆինանսական հոսքերը անցել են նրա հոր և եղբոր հաշիվներով։

«...Արդյունքում բյուջե մուտք չի եղել 50 միլիոն ռուբլի, գումարած 20 միլիոն պարտք՝ ըստ տուգանքների։ Եկամտի 10 միլիոնով նրանք գնել են Lamborghini»,- գրում է Mash-ը։

Սուբհան Մամեդովի նկատմամբ ներկայումս հայտարարվել է հետախուզում։