Վրաստանի վարչապետ Իրակլի Կոբախիձեն հայտարարել է, որ Եվրամիության հետ առանց վիզայի ռեժիմի հնարավոր կասեցումը երկրի համար «էկզիստենցիալ հարց» չէ, ի տարբերություն խաղաղության և կայունության պահպանման։ Նա այս մասին ասել է հուլիսի 17-ին՝ մեկնաբանելով Եվրահանձնաժողովի նամակը, որով Վրաստանի կառավարությունից պահանջվում է իրականացնել ութ առաջարկություն։
«Եթե հարցը դրվի այսպես՝ կամ խաղաղություն և
կայունություն, կամ վիզայի ազատականացում, մենք անպայման նախապատվությունը կտանք
խաղաղությանը և կայունությանը։ Սա վրաց ժողովրդի ընտրությունն է։ Ահա այսպես են մեզ
դնում ընտրության առաջ»,- հայտարարել է Վրաստանի վարչապետը։
«Մեզ
ասում են, որ չի կարելի ընդունել օրենք, որը սահմանափակում է երկրում հեղափոխական
գործընթացները ֆինանսավորելու արտաքին խաղացողի հնարավորությունը: Սա սպառնալիք է
կայունությանը: Եթե հարցը այդպես է դրվում, մենք ընտրում ենք կայունությունը: Մենք
չենք զիջի»,- ընդգծել է Կոբախիձեն:
Նա նաև հայտարարել է, որ իշխանություններին
ներկայացված Եվրամիության պահանջները իրավականորեն հիմնավորված չեն, այլ «դատարկ
քաղաքական վերջնագրեր» են։ Քաղաքական գործիչը հավելել է, որ «Արտաքին ազդեցության
թափանցիկության մասին» օրենքները և «Ընտանեկան արժեքների և անչափահասների
պաշտպանության մասին» օրենսդրական փաթեթը, որոնք ԵՄ-ն պահանջում է չեղարկել,
անհրաժեշտ են «ընտանեկան արժեքների, անչափահասների իրավունքների պաշտպանության և ապակառուցողական
գործընթացների կանխարգելման» համար։
Կոբախիձեն ԵՄ-ի վարքագիծը համեմատել է
Խորհրդային Միության պրակտիկայի հետ: «Խորհրդային Միությունում հրահանգները գալիս
էին Մոսկվայից. եթե չկատարես, կպատժվես: Ինչո՞վ է Բրյուսելը տարբերվում Մոսկվայից:
Բրյուսելը չպետք է դառնա խորհրդային Մոսկվայի նման», - ասել է նա:
