Մեծ Բրիտանիայի վարչապետ Քիր
Ստարմերը հայտարարել է, որ Մեծ Բրիտանիան ևս կճանաչի Պաղեստին պետությունը
սեպտեմբերին ՄԱԿ-ի Գլխավոր ասամբլեայում: Հիշեցնենք, որ այս մասին ավելի վաղ
հայտարարել էր Ֆրանսիայի նախագահ Էմանուել Մակրոնը:
Ստարմերը նշել է, որ 2023
թվականի հոկտեմբերի 7-ին ՀԱՄԱՍ-ը կատարել է Իսրայելի պատմության մեջ
ամենասարսափելի կոտորածը։ Այդ ժամանակվանից ի վեր սարսափը շարունակվում է ամեն օր։
Պատանդները դեռևս գերության մեջ են։ Պաղեստինի ժողովուրդը սարսափելի տառապանքներ է
կրել. «Այժմ Գազայում, օգնության մատակարարումների աղետալի ձախողման պատճառով,
մենք տեսնում ենք քաղցած նորածինների, երեխաների, որոնք այնքան թույլ են, որ չեն
կարող ոտքի վրա կանգնել, պատկերներ, որոնք մեզ հետ կմնան ողջ կյանքի ընթացքում»։
Մեծ Բրիտանիայի վարչապետի
խոսքով՝ տառապանքը պետք է ավարտվի. «Ես երեկ քննարկեցի սա նախագահ
Թրամփի հետ, և մենք մեծ ջանքեր ենք գործադրում օդային ճանապարհով մարդասիրական
օգնությունը վերսկսելու համար, և այսօր բրիտանական օգնությունը օդով հասցվել է
Գազա և, որ ամենակարևորն է, ցամաքով։ Մենք պետք է ամեն օր տեսնենք առնվազն 500
բեռնատար, որը ամեն օր մտնում է Գազա»։
Ստարմերն ընդգծել է, որ վերջին հաշվով, այս մարդասիրական
ճգնաժամը վերացնելու միակ ճանապարհը երկարաժամկետ կարգավորումն է։ «Ուստի մենք աջակցում
ենք ԱՄՆ-ի, Եգիպտոսի և Կատարի ջանքերին՝ ապահովելու կենսականորեն կարևոր հրադադարը։
Այդ հրադադարը պետք է լինի կայուն և հանգեցնի ավելի լայն խաղաղության ծրագրի, որը
մենք մշակում ենք մեր միջազգային գործընկերների հետ։
Այդ ծրագիրը կապահովի անվտանգություն ու պատշաճ կառավարում Գազայում և բանակցային ճանապարհ
կհարթի երկու պետությունների լուծման վերաբերյալ: Մեր նպատակը մնում է նույնը՝
անվտանգ և պաշտպանված Իսրայել՝ կենսունակ և ինքնիշխան պաղեստինյան պետության կողքին:
Սակայն այս պահին այդ նպատակը ճնշման տակ է, ինչպես երբեք: Ես միշտ ասել եմ, որ
մենք ճանաչում ենք պաղեստինյան պետությունը որպես ներդրում պատշաճ խաղաղության
գործընթացում՝ երկու պետությունների լուծման համար առավելագույն ազդեցության
ժամանակաշրջանում»:
Ինչպես նշել է Մեծ Բրիտանիայի վարչապետը, եկել է
գործելու ժամանակը, քանի որ այդ լուծումն այժմ վտանգված է։
«Ուստի այսօր, որպես խաղաղության հասնելու
այդ գործընթացի մաս, կարող եմ հաստատել, որ Մեծ Բրիտանիան կճանաչի Պաղեստին
պետությունը սեպտեմբերին ՄԱԿ-ի Գլխավոր ասամբլեայում, եթե Իսրայելի
կառավարությունը էական քայլեր չձեռնարկի Գազայի սարսափելի իրավիճակին վերջ դնելու
համար, չհամաձայնի հրադադարին և չստանձնի երկարաժամկետ կայուն խաղաղության հասնելու
պարտավորություն, որը կվերականգնի երկու պետությունների լուծման հեռանկարը։ Եվ դա
ներառում է ՄԱԿ-ին թույլ տալ վերսկսել օգնության մատակարարումները և հստակ
հայտարարություն անել, որ չի լինի Արևմտյան ափի որևէ բռնակցում»,- եզրափակել է
Ստարմերը։
