Քոչարյանասերժական կլանին 30 տարի ծառայած գիտական էլիտայի համար դամբարան են դառնալու նրանց փակվող գրասենյակները. Փաշինյան․ Տեսանյութ

«Հունիսի 20-ին պետք է իրականացնենք 2018-ին մեկնարկած հեղափոխության երկրորդ փուլը, կրկին ոչ բռնի, կրկին ժողովրդական, բայց այս անգամ արդեն պողպատյա հեղափոխությունը, և Հայաստանում հաստատելու ենք օրենքի և իրավունքի դիկտատուրա»,- այսօր՝ հունիսի 13-ին, նախընտրական քարոզարշավի շրջանակներում Կոտայքի մարզ կատարած այցելության ժամանակ Բյուրեղավանում հայտարարեց ՀՀ վարչապետի պաշտոնակատար Նիկոլ Փաշինյանը:

Նրա խոսքով՝ պսևդո-էլիտաները դուրս են եկել պայքարի ոչ թե կառավարության դեմ, այլ ժողովրդի. «Որովհետև նրանց հարկավոր է իշխանություն, իսկ այդ իշխանությունը կառավարության ձեռքում չէ, այդ իշխանությունը ժողովրդի ձեռքում է գտնվում, և նրանք ուզում են ժողովրդին զրկել իշխանությունից: 30 տարի Հայաստանի գիտական էլիտան ծառայել է քոչարյանասերժական կլանին՝ ժողովրդից իշխանությունը խլելու նպատակով: Նրանք քաղաքական միմոսներ են եղել և շարունակում են լինել, մենք նրանց ուղարկելու ենք հանրապետականների, քոչարյանականների փակվող գրասենյակներ, և այդ գրասենյակները դամբարան են դառնալու նրանց համար»:

Փաշինյանն ընդգծեց. «Մենք մեր երկրի, մեր եկեղեցու ազնիվ հոգևորականներին ազատելու ենք կոռումպացված հոգևոր էլիտայի նվաստացումներից: Հայաստանի կոռումպացված համակարգը գործել է նաև այնտեղ: Այսօր արդարը կանգնում է արդարի կողքին, կոռումպացվածը կանգնում է կոռումպացվածի կողքին»:

Նա ժողովրդին կոչ արեց գնալ ընտրությունների և քվեարկել ոչ թե իրենց քաղաքական ուժի, այլ հենց ժողովրդի իշխանության օգտին: