Ավստրալիացի մի շարք քաղաքական գործիչներ, շնորհավորելով Հայաստանի Անկախության օրը, բարձրաձայնել են ադրբեջանական ագրեսիայի մասին

Ավստրալիայի դաշնային բարձրաստիճան խորհրդարանականների մի խումբ միացել է հայ-ավստրալական համայնքին՝ նշելու Հայաստանի Հանրապետության 30-ամյակը: Նրանցից շատերը նաև անդրադարձել են Հայաստանի առջև ծառացած շարունակական սպառնալիքներին և ներխուժումներին, հայտնում է Ավստրալիայի Հայ դատի հանձնախումբը:

Կառավարության ներկայացուցիչ և ընդդիմադիր նախարարները Ավստրալիա-Հայաստան միջխորհրդարանական միության (Բարեկամության խումբ) անդամներից են, ովքեր տեսաուղերձներ են հղել՝ ևս մեկ անգամ բարձրաձայնելով Հայաստանի անվտանգությանը և ինքնիշխանությանը վերաբերող մտահոգությունները Ադրբեջանի կողմից կազմակերպված հարձակումների հետևանքով, որը շարունակվում է Բաքվի կողմից 44 օր տևած ռազմական հանցագործությունների մեկնարկից մոտ մեկ տարի անց:

Պատերազմը հանգեցրեց Արցախի Հանրապետության օկուպացմանը:

Ձեզ ենք ներկայացնում  մի քանի ուղերձ՝  նրանց կողմից:

«Հպարտ եմ, որ ներկայացնում եմ  մի շարք նշանավոր հայ-ավստրալացիների համայնքը և շատ ուրախ եմ նշել Հայաստանի Հանրապետության ստեղծման 30-ամյակը. երկրորդ անգամ Հայաստանը դարձավ անկախ պետություն»,- նշել է Ավստրալիայի կապի, քաղաքային ենթակառուցվածքների, քաղաքների և արվեստի նախարար Փոլ Ֆլեթչերը:

Պարոն Ֆլեթչերը հավելել է, որ անցյալ տարվա իրադարձությունները Լեռնային Ղարաբաղում, ցավոք, հիշեցնում են, որ Հայաստանի անվտանգությունը մշտական զգոնություն պահանջող խնդիր է: Նա նշել է, որ դա նաև միջոց է, որ համաշխարհային հանրությունում երբեք չմոռանան Հայոց ցեղասպանությունը:

Ներքին գործերի նախարար և Ավստրալիայի Սենատում ընդդիմության առաջնորդի տեղակալ Քրիստինա Քենելին նույնպես միացել է շնորհավորանքներին: Նա նշել է, որ արդեն 30 տարի է, ինչ հայ ժողովուրդը գրեթե միաձայն հռչակել է իր անկախությունը՝ 1991 թվականի հանրաքվեով. քվեարկություն, որը նշանավորել է Հայաստանի Հանրապետության անկախության երկրորդ հռչակումը:   

«Սա մի փաստ է, որը ծառայում է մեզ՝ հիշեցնելու հայ ժողովրդի պայքարն ու բոլոր սպառնալիքները հաղթահարելու հզոր կամքը»,- ասել է սենատոր Քենելին՝ հավելելով, որ նրանք նշում են հայ ժողովրդի այն ուժն ու վճռականությունը, որով նա կարողացել  է հաղթահարել ցեղասպանությունն ու օկուպացիայից բխող սարսափները և կերտել ժամանակակից պետություն:

«Այսօր, մասնավորապես, իմ մտքերն այն ընտանիքների և ընկերների հետ են, ովքեր տուժել են այս համաճարակից և, իհարկե, տարածաշրջանում շարունակվող բռնություններից»,- հավելել է նա:

Ավստրալիա-Հայաստան միջխորհրդարանական միության նախագահ և փոխնախագահ Տրենտ Զիմմերմանն իր ուղերձում նշել է. «Այսքան դարերի ընթացքում հայ ժողովուրդը բախվել է բազում ներքին և արտաքին դժվարությունների՝ երկար ժամանակ օկուպացված լինելով: Այս ժողովուրդը կրել է ցեղասպանության արհավիրքները, և, իհարկե, վերջին շրջանում մենք կրկին ականատես եղանք Հայաստանի հանդեպ արտաքին ագրեսիայի՝ Ադրբեջանի կողմից»:

Զիմմերմանը հավելել է, որ հայերն աներևակայելի դիմացկուն ժողովուրդ են, այդ իսկ պատճառով  բոլոր այս դարերից և խորհրդային տիրապետության տակ գտնվելուց հետո անկախությունը՝ 30 տարի առաջ, հնարավոր է դարձել: