«5-րդ ալիքը» մանիպուլացնում է․ ՔՊ-ական պատգամավորը չի ակնարկել Փաշինյանի՝ Պուտինի եռակողմ հանդիպման հրավերը մերժելու մասին. fip.am

Հասարակություն

16:03, 26 октябрь 2022

«5-րդ ալիքի» «Հայլուր» լրատվական ծրագրի հոկտեմբերի 25-ի հիմնական թողարկման ընթացքում անդրադարձ է կատարվել Ռուսաստանի նախագահ Վլադիմիր Պուտինի մասնակցությամբ ՀՀ վարչապետ Նիկոլ Փաշինյանի և Իլհամ Ալիևի սպասվող հնարավոր հանդիպման մասին տեղեկություններին։

Հոկտեմբերի 23-ին ռուսաստանյան «Վեդոմոստի» կայքը, հղում անելով իր դիվանագիտական աղբյուրներին, գրել էր, որ Փաշինյանը և Ալիևը կարող են հանդիպել ՌԴ-ում՝ Պուտինի միջնորդությամբ եռակողմ բանակցություններ անցկացնելու նպատակով։

Լուրերի մեկնաբանը, հղում անելով հոկտեմբերի 25-ին լրագրողների հետ ճեպազրույցի ընթացքում ԱԺ «Քաղաքացիական պայմանագիր» խմբակցության պատգամավոր Գագիկ Մելքոնյանի խոսքերին, պնդում է, թե վերջինս ակնարկել է՝ «Փաշինյանը կարող է մերժել Պուտինի հանդիպման հրավերը»։

Վերոհիշյալ ճեպազրույցի ընթացքում, պատասխանելով լրագրողի հարցին, թե «ի՞նչ սպասելիքներ կան Փաշինյան-Պուտին-Ալիև առաջիկա հանդիպումից», Մելքոնյանն ասել է, որ ինքը «ոչ մի լավ սպասում չունի էդտեղից»։

«Չգիտեմ՝ կլինի, թե չի լինի։ Կարող է և չլինի հանդիպումը, ո՞վ ա ասել, որ լինելու ա»,- ասել էր Մելքոնյանը։

Նրա այս հարցին ի պատասխան լրագրողներն ասել էին՝ «Կրեմլից են ասել», իսկ Մելքոնյանն էլ պատասխանել էր՝ «Կրեմլից ձեզ են (լրագրողներին-խմբ․) ասել, մեզ չեն ասել»։

Փաստացի, պատգամավոր Մելքոնյանն ընդամենը կասկածի տակ էր առնում եռակողմ հանդիպման կայանալու հնարավորությունը, և որևէ ակնարկ չէր անում Փաշինյանի՝ Պուտինի հրավերը մերժելու մասին։

Այսպիսով, «5-րդ ալիքի» պնդումը, թե ՔՊ-ական պատգամավորն ակնարկել է ՀՀ վարչապետի կողմից հնարավոր եռակողմ հանդիպման հրավերը մերժելու մասին, չի համապատասխանում իրականությանը։

Արդեն այսօր՝ հոկտեմբերի 26-ին, ՀՀ ԱԺ նախագահ Ալեն Սիմոնյանն ասաց, որ իր տեղեկություններով Փաշինյանը հոկտեմբերի 31-ին Սոչիում կմասնակցի ՌԴ նախագահի միջնորդությամբ Ալիևի հետ հանդիպմանը։

fip.am