Մենք սովորել ենք նիկոլավարի ապրել, էլ հետ գնալ չկա. բյուրեղավանցիները՝ Նիկոլ Փաշինյանի մասին․ Տեսանյութ

Այսօր՝ հունիսի 13-ին, ՀՀ վարչապետի պաշտոնակատար Նիկոլ Փաշինյանը արտահերթ խորհրդարանական ընտրությունների քարոզարշավի շրջանակներում այցելել է Կոտայքի մարզ: Մեր նկարահանող խումբը հարցում անցկացրեց Բյուրեղավանում՝ պարզելու, թե ինչ ակնկալիքներ ունեն բնակիչները Նիկոլ Փաշինյանից:

«Ես արտասահմանից եմ եկել ու հանգիստ եմ ապրում: Գոհ եմ, որովհետև որտեղ դիմել եմ՝ ոչ կաշառք է եղել, ոչ խոչընդոտ: Վստահ եմ՝ եթե պատերազմը չլիներ, ամեն ինչ շատ լավ էր լինելու»,- ասաց մեզ հետ զրուցած կանանցից մեկը:

Մեր հարցին՝ վերջին 3 տարիներին ինչ փոփոխություններ են նկատել, բնակչուհիներից մեկն ասաց. «Նախ՝ 3 տարի չի, կարող եմ ասել՝ 1 տարի է, քանի որ եղավ կորոնավիրուս, պատերազմ: Նիկոլի օրոք մենք կարծես արթնացանք. Սերժի օրոք քանդվեց մեր ամբողջ գործարանը, իսկ Նիկոլի օրոք գործարանը սկսեց աշխատել, ու էս մի բուռ ժողովուրդը էլի սկսեց իր ընտանիքը պահել»:

«Իմ տղան պայմանագրային զինծառայող է. Սերժի ժամանակ նրա աշխատավարձը 130 հազար դրամ էր, իսկ հիմա 200 հազար դրամ է, ու սնունդն էլ շատ լավ է: Շատ գոհ եմ»,- ասաց մի կին:

«Մենք սովորել ենք նիկոլավարի ապրել, էլ հետ գնալ չկա, ուրիշ ձև չենք կարող ապրել»,- նշեց մեր զրուցակիցներից մեկը, իսկ մյուսն էլ հավելեց. «Առաջին անգամ մենք մեզ լիարժեք ՀՀ քաղաքացի ենք զգում ու գնահատված: Նախագահականի կողմից մեդալակիր եմ: Առաջին անգամ Հայաստանի Հանրապետությունը գնահատել է պատերազմի ժամանակ կատարած գործողությունները»: