Ադրբեջանի զինծառայողները բռնության գործադրմամբ են առևանգել Ռաշիդ Բեգլարյանին. հարուցվել է քրեական գործ

Արցախի Ասկերանի շրջանի Խնձրիստան գյուղի բնակիչ Ռաշիդ Արամայիսի Բեգլարյանին՝ Ադրբեջանի Հանրապետության անհայտ զինծառայողների կողմից, կամքին հակառակ առևանգելու  դեպքի առթիվ հարուցվել է քրեական գործ․ այս մասին հայտնում են Արցախի Հանրապետության  դատախազությունից:

«2023 թվականի օգոստոսի 1-ին, ժամը 17-ի սահմաններում, Արցախի Ասկերանի շրջանի Խնձրիստան գյուղի բնակիչ Ռաշիդ Արամայիսի Բեգլարյանը Շուշիի շրջանի Հին Շեն գյուղից ոտքով, Լեռնային Ղարաբաղի Հանրապետության և Հայաստանի Հանրապետության միջև կապն ապահովող Լաչինի միջանցքի Հակարիի կամրջին Ադրբեջանի Հանրապետության կողմից 2020թ. նոյեմբերի 9-ի եռակողմ հայտարարության 6-րդ կետի պահանջների խախտմամբ տեղադրված հսկիչ- անձնագրային կետը շրջանցելով՝ ՀՀ գնալու ճանապարհին, Ադրբեջանի Հանրապետության անհայտ զինծառայողների կողմից ըստ ազգային պատկանելության, Ռ. Բեգլարյանի կամքին հակառակ, բռնության գործադրմամբ գաղտնի առևանգվել է, ինչին հետևել է վերջինիս անհետանալը:

Նկարագրված դեպքի առթիվ 02.08.2023թ. հարուցվել է քրեական գործ՝ Արցախի քրեական օրենսգրքի 418-րդ հոդվածով /Մարդկության անվտանգության դեմ ուղղված հանցագործությունները/  նախատեսված հանցագործության հատկանիշներով:

Գործի մինչդատական քրեական վարույթի օրինականության նկատմամբ հսկողությունը և դատավարական ղեկավարումն իրականացնում է  Շուշիի և Քաշաթաղի շրջանների դատախազությունը»,- ասված է հաղորդագրության մեջ: