Հակարիի կամրջի վրա ապօրինի անցակետի հայտնվելուց հետո ադրբեջանցի «էկոակտիվիստները» դադարեցնում են իրենց «բողոքի ակցիան» Լաչինի միջանցքում

Լաչին-Ստեփանակերտ ճանապարհին կազմակերպված  «բնապահպանական ակցիայի», որը շարունակվում է արդեն 138 օր, մի խումբ մասնակիցներ Ադրբեջանի կառավարության ներկայացուցիչների կողմից հրավիրվել են հերթական հանդիպման։

Հանդիպմանը, որը տեղի է ունեցել այսօր կեսօրին Շուշիի շրջանում Ադրբեջանի նախագահի հատուկ ներկայացուցչության վարչական շենքում, մասնակցել են տասը ադրբեջանցի «էկոակտիվիստներ»։

Շուշիի շրջանում Ադրբեջանի նախագահի հատուկ ներկայացուցիչ Այդին Քերիմովը «էկոակտիվիստներին» ասել է, որ ապրիլի 23-ից հետո, երբ պետական սահմանային ծառայության ստորաբաժանումները անցակետ են տեղադրել Հայաստանի հետ սահմանին Լաչին-Ստեփանակերտ ճանապարհի սկզբում, սկզբունքորեն նոր իրավիճակ է. առաջացել: Հետևաբար ակցիայի մասնակիցներին խնդրել են դադարեցնել դրա անցկացումը։

«Էկոակտիվիստները» Ադրբեջանի նախագահի հատուկ ներկայացուցչի ուշադրությունն են հրավիրել այն փաստի վրա, որ իրենց «բողոքի ակցիայի» վերջնանպատակին իրենք դեռ չեն հասել, և իրենց պահանջը, այն է՝ դադարեցնել բնական ռեսուրսների ապօրինի շահագործումը ռուս խաղաղապահների ժամանակավոր հսկողության տակ գտնվող «ադրբեջանական տարածքներում» և պայմաններ ստեղծել Ադրբեջանի համապատասխան պետական կառույցների կողմից մոնիտորինգի համար, խաղաղապահ կոնտինգենտի հրամանատարությունը այդպես էլ չի կատարել:

«Էկոակտիվիստները» հանդես են եկել հայտարարությամբ, որում մասնավորապես ասվում է. «Մենք հայտարարում ենք, որ եթե խաղաղապահ զորախմբի հրամանատարությանն ուղղված՝ Ադրբեջանի տարածքներում օգտակար հանածոների հանքավայրերի ապօրինի շահագործումը դադարեցնելու և մոնիտորինգի համար պայմաններ ապահովելու մեր պահանջները չբավարարվեն, մենք իրավունք կունենանք վերսկսելու ակցիան»։