Սամվել Կարապետյանը՝ նույն ինքը
«Տաշիր Սամո»-ն, որը խոստացել է քաղաքական ուժ հիմնել ու ոտքով-գլխով թաթախվել քաղաքականության
մեջ, ԱԱԾ-ից օրումեջ ուղերձներ հղելուն զուգահեռ, պարզվում է՝ նաև ՀԿ է գրանցել պետռեգիստրում։
Ինչպես երևում է՝ նրա կողմից բացվելիք, ձևավորվելիք ու կազմավորվելիք բոլոր պրոյեկտները
կրելու են «մեր ձևով» «բրենդը»։
Շաբաթներ առաջ «Մեր ձևով» կամավորական
շարժման մասին ազդարարվեց, ընթացիկ ամսվա 9-ին գրանցված ՀԿ-ն էլ
կրում է «Մեր ձևով ազգային արժեքների
պահպանության» ՀԿ անունը։ Թե ինչ արժեքներ են պաշտպանելու, ումից են պաշտպանելու ու
ինչպես՝ հայտնի չէ։ Կարևորը՝ զիլ անունը դրել են ու բզբզալու թեմա գտել։
Ինչ-որ բան հուշում է, որ քաղաքական
ուժը, որը Կարապետյանը պլանավորում է առաջիկայում ձևավորել ու մասնակցել գալիք ԱԺ ընտրություններին, նույն անունն
է կրելու՝ նորաթուխ քաղգործիչները «ձևից» ձեռք
չեն քաշելու։ Խնդիրն այն է՝ արդյոք «ձևը» կարողանալո՞ւ է ապահովել նաև բովանդակություն՝ նոր, այլընտրանքային, ադեկվատ
ասելիք ու անելիք, թե՞ «հայավարի»-ի անվան
տակ փորձելու են սղացնել «ռուսավարին»՝ իրենց հայտնի կենտրոնից թելադրված նարատիվները՝
«խորը անասունի» տեղ դնելով ազգին ու ժողովրդին։
Ե. Ա.
