Մոլդովայի եվրոպամետ «Գործողություն և համերաշխություն» (PAS) իշխող կուսակցության առաջնորդ Իգոր Գրոսուն կարծում է, որ սեպտեմբերի 28-ի խորհրդարանական ընտրությունները քաղաքացիներին կանգնեցրել են պատերազմի և խաղաղության միջև ընտրության առաջ։ Նա այս մասին հայտարարել է Associated Press-ին տված հարցազրույցում։

Գրոսուի խոսքով՝ այս ընտրությունների արդյունքները կորոշեն Մոլդովայի ապագան ոչ միայն հաջորդ չորս տարիների, այլև առաջիկա երկար տարիների համար։

PAS կուսակցությունը 2021 թվականից ի վեր ունի խորհրդարանական մեծամասնություն, սակայն կիրակի օրվա ընտրություններում այն ​​կորցնելու ռիսկ կա։

Գրոսուն, որը նաև խորհրդարանի խոսնակն է, հայտարարել է, որ կիրակի օրվա ընտրությունները այլևս ուղղակի ընտրություն չեն Արևելքի և Արևմուտքի միջև, այլ ընտրություն են խաղաղության և պատերազմի միջև. «Խաղաղությունը նշանակում է ԵՄ, իսկ պատերազմը՝ Ռուսաստան։ Իրավիճակը շատ սրվել է, շատ պարզեցված է դարձել»։

«Դրանք գոյաբանական ընտրություններ են ճամփաբաժանին։ Միջին ուղի, միջին տարբերակ չկա»,- հավելել է Մոլդովայի խորհրդարանի խոսնակը։

Գրոսուն ընդգծել է, որ խաղադրույքները շատ բարձր են, քանի որ Ռուսաստանը, նրա խոսքով, կարող է դանդաղեցնել կամ հնարավոր է՝ խափանել ԵՄ-ին միանալու Մոլդովայի ուղին։