ՀՀ ներքին գործերի նախարարության ոստիկանության քրեական ոստիկանության գլխավոր վարչության Կոտայքի մարզային քրեական վարչության ծառայողները տեղեկություններ են ստացել, որ շուրջ 20 օր առաջ «Չխկո» մականվամբ, Կոտայքի մարզի բնակիչներ 37-ամյա Արտակ Ն․-ի և 30-ամյա Վրեժ Հ․-ի միջև Եղվարդ քաղաքի քաղաքապետարանի հարակից տարածքում վիճաբանություն է տեղի ունեցել՝ կապված Արտակ Ն․-ի կողմից Վրեժ Հ․-ին հայհոյելու հետ, որի ընթացքում վերջինս ծեծի է ենթարկել Արտակ Ն․-ին։
Ինչպես հայտնում է Shamshyan.com-ը, ըստ օպերատիվ տվյալների՝ նշված դեպքից հետո Արտակ Ն․-ն զանգահարել և հայհոյել է Վրեժ Հ․-ին, որն իր ընկերներ, Կոտայքի մարզի բնակիչներ 31-ամյա Արծրուն Մ․-ի և 22-ամյա Հայկ Բ․-ի հետ հանդիպել են Արտակ Ն․-ին, որը գտնվել է իր կողմից շահագործվող «Ռենջ Ռովեր» մակնիշի ավտոմեքենայով, և վերջիններս դարձյալ ծեծի են ենթարկել Արտակ Ն․-ին՝ վնասելով նաև ավտոմեքենան։
Կոտայքի քրեական ոստիկանների կողմից ձեռնարկվում են միջոցառումներ Արտակ Ն․-ին, Վրեժ Հ․-ին, Արծրուն Մ․-ին և Հայկ Բ․-ին հայտնաբերելու ուղղությամբ։
Դեպքի փաստով կազմվել են փաստաթղթեր, որոնք փոխանցվել են ՀՀ քննչական կոմիտեի Կոտայքի մարզային քննչական վարչության Նաիրիի քննչական բաժին։
