ՀՀ ԱԺ «Քաղաքացիական պայմանագիր» խմբակցության պատգամավոր Բաբկեն Թունյանը ֆեյսբուքյան իր էջում գրել է․

«Արման Թաթոյանը, իր խոսքերով, «տարիների բարձունքից» գնահատական է տալիս Նիկոլ Փաշինյանի և Քաղաքացիական պայմանագրի իշխանության գալուն (ատելության ալիքի վրա և այլն), բայց երբ լրագրողը հարցնում է՝ ինչպես է վերաբերվում Սերժ Սարգսյանի կողմից վարչապետի պաշտոնը ստանձնելուն, համառորեն չի ուզում մտնել այդ թեմայի մեջ, լրագրողին թույլ չի տալիս իրեն «տանել այդ օրակարգ»: Լրագրողը հիշեցնում է, որ պարոն Թաթոյանը քաղաքական հայտ է ներկայացրել, ըստ այդմ, իրեն կարող են հարցնել՝ ինչպես է վերաբերվում կոնկրետ անձի կոնկրետ գործողությանը, ասում է՝ կոնկրետ անձերի թեմաների մեջ չեմ մտնում, անձերին գնահատական չեմ ուզում տալ:

Նիկոլ Փաշինյանի կողմից մուրճը ցույց տալու թեմայի վրա քաղաքական թեզեր է հնչեցնում, ներկայիս իշխանության (գործադիր և օրենսդիր) բոլոր ներկայացուցիչների մասնագիտական որակները կասկածի տակ է դնում, բայց փաստացի երրորդ ժամկետով իշխանություն ստանձնելու երևույթին գնահատական չի տալիս, «վեր է կանգնած այդ թեմայից»,ու հպարտությամբ ասում է, որ չի հաջողվելու իրենից գնահատական կորզել:

Խոսում է գործող Սահմանադրության թերությունների մասին, բայց երբ լրագրոը հարցնում է 2015-ին ի՞նչ կարծիք ուներ Սահմանադրության փոփոխությունների մասին, ասում է՝ ես այն ժամանակ պաշտոնյա էի, պրոֆեսիոնալ գործով էի զբաղված, իմ ֆունկցիաների մեջ չէր մտնում կարծիք հայտնել:

Լրագրողը հարցնում է՝ ինչպե՞ս է վերաբերվում Սամվել Կարապետյանի քաղաքական հայտարարություններին, և ընդհանրապես, խոշոր բիզնեսի՝ քաղաքականություն մտնելուն, մարդը մի քանի րոպե խոսում է ամեն ինչից (իշխանության գործելաոճից, քաղաքական հետապնդումներից), բացի կոնկրետ հարցին պատասխանելուց:

Արդեն գուշակեցիք պատասխանը՝ «որևէ անձի գնահատական չի տալու»)))

Կոնկրետ ուժերի հետ կոալիցիա ձևավորելու մասին է հարցնում, ասում է՝ կանխատեսումներ չի անում: Եվ իհարկե, «գնահատականներ չի տալիս»: Բացի իշխանություններից, իհարկե:

Բնականաբար, մյուս հարցերի վերաբերյալ էլ (խաղաղության պայմանագիր և այլն) «պատասխանները» նույն տրամաբանության մեջ էին: Եվ այդպես՝ 53 րոպե:

Այլ կերպ ասած, մարդը եկել էր հարցազրույցի, որ ասի՝ հույս չունենաք, որ հարցերին կպատասխանեմ: Մի պահ մտածեցի՝ Բագրատ Գալստանյանի Հ1-ի հարցազրույցի երկրորդ սերիան է, ուղղակի առանց սքեմի:

Պարոն Թաթոյան, իրականում Դուք տվեցիք ամենակարևոր հարցի պատասխանը, թե ինչո՞ւ Ձեզ չի կարելի ընտրել:

Հ.Գ. - Արշալույս Մղդեսյան ջան, ապրես»։