Ռուսաստանում կարող է քաղաքացիական պատերազմ բռնկվել
կուտակված սոցիալական, տնտեսական և քաղաքական հակամարտությունների պատճառով, նախազգուշացրել
է ՌԴ նախագահի՝ մոնիտորինգի և սոցիալական գործընթացների վերլուծության հարցերով վարչության
ղեկավար Ալեքսանդր Խարիչևը։ Նա այս մասին գրել է իր «Ովքե՞ր ենք մենք» հոդվածում «Գոսուդարստվո»
ամսագրի համար։
Խարիչևի կարծիքով՝ քաղաքացիական պատերազմը Ռուսաստանի
առջև ծառացած հինգ մարտահրավերներից մեկն է։ Բացի դրանից, երկրին սպառնում են քաղաքական,
տարածքային և մշակութային ինքնիշխանության կորուստ, դեպոպուլյացիա, իշխանության նկատմամբ
քաղաքացիների վստահության կորուստ և քաղաքական համակարգերի փլուզում, ինչպես նաև «դեհումանիզացիա»
և ռուսների վերածում «սպառողական սուբյեկտների»։
Կրեմլի ներկայացուցիչը նշել է, որ քաղաքացիական պատերազմի
սպառնալիքին պատասխանը պետք է լինի միասնական և համերաշխ սոցիումի ձևավորումը: Խարիչևն
առաջարկել է նման հասարակություն ստեղծել «Մենք չենք լքում մերոնց» գաղափարախոսության
միջոցով, որը հիմնված կլինի «սեփական քաղաքակրթական կոդի» վրա: Նույն այդ գաղափարախոսությունը
պետք է պաշտպանի «ինքնիշխանության կորստից»: Խարիչևը հայտարարել է, որ արագ պետք է
ընդունել «հայրենասիրական» դաստիարակության մասին օրենք, որը կպարտավորեցնի իշխանության
բոլոր մարմիններին, կրթական հաստատություններին և պետական կառույցներին քաղաքացիների
մեջ սերմանել համապատասխան վերաբերմունք:
