Ռուսաստանի քաղաքացիներին բազմակի մուտքի վիզաներ այլևս չեն տրամադրվի։ Տեղեկանում ենք BBC-ի ռուսական ծառայությունից, այս մասին ճեպազրույցի ժամանակ հայտարարել է Եվրահանձնաժողովի խոսնակ Մարկուս Լամերտը։
Նա նշել է, որ Ռուսաստանի քաղաքացիներն այժմ պարտավոր կլինեն Եվրոպա մեկնելիս ամեն անգամ դիմել վիզայի համար, ինչը հնարավորություն կտա ավելի մանրակրկիտ ստուգում անցկացնել։
Փաստաթուղթն ընդունվել է նոյեմբերի 6-ին։ Նոր կանոնների համաձայն՝ ԵՄ երկրները կարող են բազմակի մուտքի Շենգենյան վիզաներ տրամադրել միայն ԵՄ երկրներում բնակության իրավունք ունեցողների ընտանիքի անդամներին և տրանսպորտային ոլորտի աշխատակիցներին (նավաստիներ, վարորդներ և գնացքի ուղեկցորդներ)։
Միևնույն ժամանակ երկրները որոշակի դեպքերում կարող են տրամադրել ավելի կարճաժամկետ վիզաներ կամ, ընդհակառակը, մինչև հինգ տարի ժամկետով վիզաներ, մասնավորապես՝ այլախոհներին, անկախ լրագրողներին, իրավապաշտպաններին և այլ խոցելի ռուսաստանցիների և նրանց ընտանիքի անդամներին։
Նոր կանոնները վերաբերում են միայն Ռուսաստանում բնակվող Ռուսաստանի քաղաքացիներին։
