Վաշինգտոնում
Սպիտակ տան մոտ տեղի ունեցած հրաձգությունից հետո, որի հետևանքով տուժել են ԱՄՆ
Ազգային գվարդիայի երկու զինծառայողներ, պարզվել է, որ հրաձիգը Միացյալ Նահանգներ
է ժամանել Աֆղանստանից։
Դոնալդ
Թրամփը կրակողին անվանել է «կենդանի» և ասել, որ նա «շատ թանկ կվճարի»։ Ավելի ուշ
նա հանդես է եկել ամերիկացիներին ուղղված ուղերձով՝ հայտարարելով, որ հարձակումը եղել
է «ատելության և ահաբեկչության ակտ»։ Թրամփի խոսքով՝ կրակողը Միացյալ Նահանգներ է
ժամանել Աֆղանստանից 2021 թվականին։ Ներքին անվտանգության նախարար Քրիստի Նոեմը
պարզաբանել է, որ կրակողը ժամանել է 2021 թվականի սեպտեմբերին՝ Քաբուլում
կառավարության ձախողումից հետո, երբ ԱՄՆ-ն տարհանեց մարդկանց թալիբների կողմից
քաղաքը գրավելուց հետո։
«Այժմ
մենք պետք է վերանայենք բացարձակապես ամեն մի օտարերկրացու հանդեպ քաղաքականությունը, որը Աֆղանստանից մեր երկիր է
մուտք գործել Բայդենի օրոք, և մենք պետք է ձեռնարկենք բոլոր անհրաժեշտ միջոցները՝
ապահովելու համար ցանկացած երկրից ցանկացած օտարերկրացու արտաքսումը, որը չպետք է
այստեղ լինի կամ որը որևէ օգուտ չի բերում այս երկրին»,- ասել է Թրամփը։
Ազգային գվարդիայի տուժած զինծառայողների վիճակը ծանր է (ավելի
վաղ հայտարարել էին, որ երկուսն էլ զոհվել են): ABC News-ի տեղեկություններով՝
նրանք կին և տղամարդ են, որոնց տեղափոխել են տեղի հիվանդանոցներ: Կրակողը, ինչպես
իր ուղերձում նշել է Թրամփը, նույնպես ծանր վիրավորվել է: Նրա հարձակման
դրդապատճառը անհայտ է:
