ԱՄՆ-ը 25%-ի չափով մաքսատուրք է սահմանում այն երկրների համար, որոնք Իրանի հետ բիզնես են անում, հայտարարել է ԱՄՆ նախագահ Դոնալդ Թրամփը TruthSocial սոցիալական ցանցում։

Նրա խոսքով՝ ցանկացած երկիր, որ Իրանի հետ բիզնես է անում, «կվճարի 25%-ի չափով մաքսատուրք Միացյալ Նահանգների հետ իրականացվող բոլոր գործնական օպերացիաների համար»։

«Այս կարգադրությունը վերջնական է և պարտադիր»,- գրել է ԱՄՆ նախագահը։

Թրամփը որևէ մանրամասնություն չի հայտնել։

Ինչպես նշում է The Washington Post-ը, դեռևս պարզ չէ, թե արդյոք նոր մաքսատուրքերը կլինեն ի հավելո՞ւմն արդեն գոյություն ունեցող ամերիկյան մաքսատուրքերի։ Թերթի կողմից հարցման ենթարկված տնտեսագետները կարծում են, որ այդ դեպքում ԱՄՆ տնտեսությունը կարող է զգալի վնաս կրել։

Bloomberg-ը հաղորդում է, որ Իրանի հիմնական առևտրային գործընկերներն են Հնդկաստանը, Չինաստանը և Թուրքիան։