Հայ մարզիկները երեք հաղթանակ են տարել Բաքվում ընթացող հունահռոմեական ըմբշամարտի մինչև 17 տարեկանների աշխարհի առաջնության մեկնարկային գոտեմարտերում։

Մինչև 65 կգ քաշային կարգում Վազգեն Մնացականյանը 7։4 հաշվով հաղթել է Իրանի ներկայացուցչին։ Լարված գոտեմարտի ելքը հայ ըմբիշը վճռել է վերջին վայրկյաններին՝ վաստակելով հաղթական չորս միավոր։

Գեղամ Եղիազարյանը նույնպես հաջող է մեկնարկել մրցաշարում։ Նա ժամանակից շուտ՝ 9։0 հաշվով հաղթել է ուկրաինացի ըմբիշ Իլյա Վանժուլին և դուրս եկել 1/8 եզրափակիչ։

Մինչև 17 տարեկանների Եվրոպայի գործող չեմպիոն Վահե Հովեյանը, որը հանդես է գալիս մինչև 80 կգ քաշային կարգում, մեկնարկել է վրացի Լուկա Բուիգլիշվիլիի նկատմամբ հաղթանակով։ Գոտեմարտն ավարտվել է 1։1 հաշվով, սակայն հաղթանակը շնորհվել է հայ մարզիկին՝ առաջին միավորը վաստակելու չափանիշով։ Հովեյանը նույնպես դուրս է եկել 1/8 եզրափակիչ։

Այսօր Հայաստանի հավաքականի կազմում հանդես կգան նաև Արարատ Ավետիսյանը՝ 48 կգ քաշային կարգում, և Խաչիկ Խաչատրյանը՝ 110 կգ քաշային կարգում։

Մինչև 17 տարեկանների աշխարհի առաջնությունն անցկացվում է Ադրբեջանի մայրաքաղաքում հուլիսի 27-ից օգոստոսի 2-ը։ Հունահռոմեական ըմբշամարտի մրցումները մեկնարկել են հուլիսի 27-ին։