Իրանը շարունակում է մնալ պատերազմի վիճակում, իսկ Հորմուզի նեղուցում ստեղծված իրավիճակը դարձել է երկրի ազգային անվտանգության հարց։ Այս մասին հայտարարել է Իրանի արտաքին գործերի նախարարի տեղակալ Քազեմ Ղարիբաբադին՝ փոխանցում է Mehr-ը։
Նրա խոսքով՝ անհրաժեշտ են սկզբունքային փոփոխություններ նեղուց մուտքի և ելքի երթուղիներում։ Ղարիբաբադին նշել է, որ վերջին 58 տարիների ընթացքում նավերն անցել են Օմանի ջրերով, ինչը, նրա գնահատմամբ, լուրջ վնաս է հասցրել Իրանին։
Նոր ժամանակավոր համաձայնության համաձայն՝ Պարսից ծոց մուտքի միջանցքը կանցնի իրանական ջրերով, իսկ ելքի միջանցքը՝ Օմանի տարածքային ջրերով։ Ղարիբաբադիի խոսքով՝ երկու ուղղություններով էլ նավերը կանցնեն իրանական ջրերով։ Միջանցքը կգործի որպես երկկողմանի երթուղի՝ մոտ յոթ մղոն ընդհանուր լայնությամբ։
Նա ընդգծել է, որ այս երթուղին ժամանակավոր է։ Իրանը և Օմանը պետք է 30-60 օրվա ընթացքում համաձայնության գան նոր մշտական երթուղու շուրջ, որը կփոխարինի ծովային փոխադրումների նախկին սխեմային։
Ձեռք բերված պայմանավորվածության համաձայն՝ ռազմական նավերի անցումը կարգելվի, իսկ տարանցումը թույլատրված կլինի միայն առևտրային նավերին։
Ղարիբաբադին հերքել է ԱՄՆ նախագահ Դոնալդ Թրամփի հայտարարությունները Հորմուզի նեղուցի ականազերծման վերաբերյալ։ Նրա խոսքով՝ Իրանից բացի ոչ ոք չգիտի, թե որտեղ կարող են ականներ տեղադրված լինել նեղուցում։
«Եթե այդ պնդումը ճիշտ լիներ, ինչո՞ւ ոչ մի նավ չի անցնում նեղուցով», - ասել է նա։
ԱՄՆ-ի հետ հնարավոր բանակցությունների վերաբերյալ Իրանի ԱԳ նախարարի տեղակալը նշել է, որ իրավիճակը փոխվել է, և ապագա բանակցությունները չեն լինելու նախկինի նման։
Նա նաև հայտարարել է, որ Իրանը կարող է կանխարգելիչ գործողություններ ձեռնարկել՝ ազգային անվտանգությունը պաշտպանելու համար։
«Ինչո՞ւ մենք միշտ պետք է սպասենք, մինչև Ամերիկան հարձակվի մեզ վրա, որպեսզի պաշտպանենք մեզ։ Եթե մենք չենք տեսնում համապատասխան պայմաններ, ինչո՞ւ չձեռնարկենք գործողություններ ամերիկյան շահերի դեմ։ Այժմ դա մտնում է Իսլամական Հանրապետության քաղաքականության շրջանակների մեջ», - ասել է Ղարիբաբադին։
Անդրադառնալով այս շաբաթ Պակիստանի բանակի հրամանատարի՝ Թեհրան կատարած այցին՝ Ղարիբաբադին նշել է, որ իրանական կողմը նրան հայտնել է ԱՄՆ-ի նկատմամբ վստահության բացակայության մասին։
Ղարիբաբադիի խոսքով՝ եթե ԱՄՆ-ը ցանկանում է, որ Հորմուզի նեղուցում իրավիճակը կարգավորվի և նավարկությունը վերականգնվի, ապա պետք է կատարի Իրանի պայմանները, որոնք ամրագրված են համաձայնագրում։
