«Ես վստահեցնում եմ Ձեզ, որ 2023 թվականի ընթացքում մենք տրանսպորտի խնդիրը 70 տոկոսով կլուծենք»։ Այս մասին լրագրողների հետ ճեպազրույցում ասաց Երևանի քաղաքապետ Հրաչյա Սարգսյանը պատասխանելով հարցին,վթե երբ է ի վերջո բարեփոխվելու մայրաքաղաքի տրանսպորտը, երբ ենք մարդավարի երթևեկելու հարցերին:
«Գիտեք, որ մենք պայմանագիր ունենք «Ման» տիպի ավտոբուսների ձեռքբերման հետ կապված, մրցույթն արդեն կայացել է, և նոյեմբեր ամսին մեր գործընկերները արդեն կլինեն գործարանում: Համաձայն պայմանագրի՝ 2023թ. 87 հատ «Ման» մակնիշի ավտոբուսները կլինեն Երևանում, բացի այդ՝ մենք հայտարարել ենք 165 «Ջոնկտոմ» տիպի ավտոբուսների մրցույթ, որից 150-ը ամբողջությամբ պատրաստ են: 4-5 օրվա ընթացքում կուղևորվեն Չինաստանից Հայաստան»,-նշեց քաղաքապետը:
Վերջինս հայտնեց, որ բացի ավտոբուսներից Երևանի տրանսպորտը կհամալրվի նաև 30 տրոյլեբուսներով, որոնց համար երկու մրցույթն ավարտվել է: Առաջին մրցույթի արդյունքով, 15 տրոյլեբուսի ձեռքբերումը կկայանա մեկ ամսվա ընթացքում, և 2022 թվականի դեկտեմբերին կլինեն Երևանում, իսկ մյուս 15-ը ձեռք կբերվի հունվարին Կառավարության աջակցությամբ:
