Այս տարվա 6 ամիսների ընթացքում 2405 անձ է դատապարտվել, 8 անձ արդարացվել է,
15 անձի նկատմամբ, մեղսունակության վերդիկտի հիման վրա, դատարանը կայացրել է բժշկական
հարկադրանքի դատավճիռ: Դատապարտվածների ընդհանուր թվաքանակից 348-ի նկատմամբ նշանակված
պատիժը պայմանականորեն չի կիրառվել (7-ը՝ անչափահաս), 1-ի նկատմամբ կիրառվել է համաներման
ակտ: Այս տվյալներին civic.am-ը տեղեկացավ
ՀՀ վիճակագրական կոմիտեի՝ «ՀՀ սոցիալ-տնտեսական
վիճակը 2024 թվականի հունվար-հունիսին» հրապարակումից։
Դատապարտվածների ընդհանուր թվից մասնավորապես 14-ը պաշտոնատար անձինք են, 168-ը՝ զինվորական ծառայողներ,
ճնշող մեծամասնությունը՝ 1 720 անձ, չաշխատող և չսովորող աշխատունակներ, 8-ը՝ մինչև
18 տարեկան սովորողներ, 7-ը՝ 18 և բարձր տարիքի սովորողներ, 488-ը՝ այլ։
Հաշվետու ժամանակաշրջանում ազատության,
պատվի, արժանապատվության, ֆիզիկական կամ հոգեկան անձեռնմխելիության դեմ ուղղված հանցագործություններ
կատարած 100 անձ է դատապարտվել, սեռական ազատության և սեռական անձեռնմխելիության դեմ
ուղղված հանցագործություններ կատարած 9 անձ,
որոնցից 5-ը՝ 50 և ավելի բարձր տարիքի անձինք, առողջության դեմ ուղղված հանցագործություններ
կատարած՝ 41 անձ, զինվորական ծառայություն անցնելու կարգի դեմ ուղղված հանցագործություններ
կատարած՝ 103 անձ։ Ամենամեծ թվով դատապարտվածները երթևեկության անվտանգության և տրանսպորտի շահագործման
սահմանված կարգի դեմ ուղղված հանցագործություններ կատարած անձինք են՝ 1 545 հոգի։
Մասնավորապես թմրամիջոցների, հոգեմետ (հոգեներգործուն) նյութերի, դրանց պատրաստուկների,
պրեկուրսորների, խիստ ներգործող կամ թունավոր նյութերի օրինական շրջանառության դեմ
ուղղված հանցագործություններ կատարած և դատապարտված 309 անձ եղել է ՀՀ քաղաքացի, 1-ը՝ երկքաղաքացի,
2-ը՝ օտարերկրյա քաղաքացի։ Հիշյալ հանցագործությունները կատարած 70 անձ ազատազրկվել
է, 23-ը՝ դատապարտվել հանրային աշխատանքների,
8-ի նկատմամբ կիրառվել է ազատության ժամանակավոր սահմանափակում, 13-ի նկատմամբ ՝ կարճաժամկետ
ազատազրկում, 198-ի նկատմամբ՝ տուգանք։ Ըստ ՎԿ-ի՝ թմրամիջոցների շրջանառության դեմ
ուղղված հանցագործություն կատարած անձանցից 7-ը կանայք են, 5-ը՝ մինչև 18 տարեկան անձինք,
66-ը՝ 18-29 տարեկաններ, 100-ը՝ 30-39 տարեկան, 62-ը՝ 40-49 տարեկաններ, 79-ը՝ 50 և
բարձր տարիքային խմբի անձնք։
Հ․Մ․
