Գառնի-Գեղարդ, Տաթև, Դիլիջան,
Էջմիածին-Զվարթնոց, շրջայց Երևանում․ ահա այն նախընտրելի, «պահանջարկված» վայրերը, որտեղ մեկնել են ՀՀ
այցելած զբոսաշրջիկները զբոսաշրջային օպերատորների/զբոսաշրջային գործակալների
կողմից կազմակերպած շրջագայությունների (տուրերի) շրջանակում։ Վիճակագրական կոմիտեն ներկայացրել է այս տարվա
հունվար-մարտի տվյալներն առ այն, թե մեր երկիր այցելած զբոսաշրջիկներից քանիսն է այելել ՀՀ այս կամ այն տուրիստական
վայրը։ Ըստ այդմ՝ Գառնի-Գեղարդ հաշվետու
ժամանակաշրջանում այցելել է 4 970 զբոսաշրջիկ, Տաթև՝ 2 644-ը, 1837-ը նախընտրել է
Դիլիջանը, 1 537-ը՝ Խոր Վիրապը, մայրաքաղաքում
էլ շրջայց է կատարել 1901 զբոսաշրջիկ, իսկ «հայրաքաղաք» Գյումրի՝ 1 861-ը, այլ
ուղղություններով շրջագայության է մեկնել 2911 զբոսաշրջիկ։ Հունվար-մարտին
«կապուտաչյա օազիս»՝ Սևան է այցելել 931 զբոսաշրջիկ, Նորավանք՝ 689։ Ամենաքիչ
թվաքանակով զբոսաշրջիկները հաշվետու ժամանակաշրջանում այցելել են Օշական՝ 102 հոգի,
Ամբերդ՝ 145-ը, Սաղմոսավանք՝ 165-ը։
ՀՀ այցելած զբոսաշրջիկները շրջագայության են մեկնել նաև
առողջարանային Ջերմուկ (426) Խնձորեսկ
(326), Ծաղկաձոր (1200), Ենոքավան (863),
Արենի (676)։
Նշենք, որ ըստ ՎԿ-ի՝ հունվար-հունիսին ՀՀ է այցելել 946 հազար 162 զբոսաշրջիկ՝ նախորդ
տարվա նույն ժամանակաշրջանի համեմատ ավելի քիչ․ 2023-ի հաշվետու ժամանակաշրջանում ՀՀ այցելած զբոսաշրջիկների թիվը 1 մլն 7 հազար 346 էր։
2024 թ․հունվար-հունիսին ՀՀ այցելած զբոսաշրջիկներից 392 հազար 326-ը եղել են կանայք, 553 հազար 836-ը՝ տղամարդիկ։
Զբոսաշրջիկների սեռատարիքային կազմում ամենամեծ թիվը կազմում են 36-63
տարեկանները՝ 189 հազար 26 կին և 299 հազար 518 տղամարդ։
Հ․Մ․
